İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 807 Hüküm no: 979 Orijinal metin no: [134a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Yahudi Menahim’in tasarrufunda olan vakıf arsa üzerindeki mülk mahzen ve hamamın vakıf tarafından satılmadığına mütevellisinin yemin ettiği Zeytun cemâ‘atinden olup bundan akdem hâlik olan Menahim nâm Yahûdinin verâseti sulbî kebîr oğulları Mordehay ve Nesim nâm Yahûdilere münhasıra oldukdan sonra mezbûrân Mordehay ve Nesim mahfil-i kazâda mahmiye-i İstanbul’da Hüsrev Kethudâ Vakfı’na bi’l-fi‘il mütevellî olan es-Seyyid Osman b. Abdülkadir mahzarında üzerine da‘vâ ve takrîr-i kelâm edip vakf-ı mezbûrdan olup Çelebioğlu mahallesinde vâki‘ lede’l-ahâlî ve’l-cîrân ma‘lûmü’l-hudûd menzili icâre-i mu‘accele-i ma‘lûme ve senede altı bin altı yüz altmış akçe ücret-i mü’eccele ile babamız hâlik-i mezbûr Menahim’in ile’l-helâk tasarrufunda olup lâkin babamız hâl-i hayatında menzil-i vakf-ı mezbûrda izn-i mütevellî ile kendi mâlıyla mülkü olup üzerine fevkānî ve tahtânî üç kârgir mahzen ve bir fevkānî hamam binâ etmekle bin yetmiş senesi Zilka‘desi’nin on altıncı gününde harîk-i kebîrde muhterik oldukdan sonra babamız Menahim dahi hâlik olmağla ol mahzen, hamam ırsen ve arsası intikāl-i âdî ile makbûza âhara bey‘ edip biz dahi bey‘-ı mezbûru muhber olmağla makbûzu olan meblağ-ı mezbûru taleb eder[iz] suâl olunsun dediklerinde gıbbe’s-suâl mütevellî-i mezbûr cevâbında fi’l-vâki‘ bâlâda zikri mürûr eden mahzenler ve hamam mezbûrânın babaları hâlik-i mezbûrun mülkü olduğunu ikrâr lâkin âhara bey‘i inkâr edicek müdde‘iyân-ı mezbûrândan müdde‘âlarını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka zikrolunan mahzenler ve hamamı üç yüz elli riyâlî guruşa âhara bey‘ edip semeni kabz etdiğine mütevellî-i mezbûra yemîn teklîf edilmeğin ol dahi alâ-vefki’l-mesûl yemîn billâhi’l-aliyyü’l-a‘lâ etmeğin mûcebince müdde‘iyân-ı mezbûrân bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâmin [min]-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Yusuf Çavuş b. Abdullah, Ahmed b. Yusuf, Hüseyin Bey b. Abdullah, Kenan b. Ramazan, Ahmed Çelebi b. Mahmud.