.:: İstanbul Kadı Sicilleri ::.


İstanbul Mahkemesi 10 Numaralı Sicil (H. 1072-1073 / M. 1661-1663)
cilt: 51, sayfa: 808
Hüküm no: 980
Orijinal metin no: [134a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Fâtıma bt. Abdullah’ın muhâlaa yoluyla kocası Seyyid Mustafa Çelebi b. Mehmed’den boşandığı

Mahmiye-i İstanbul’da Hâcce Hatun mahallesi sâkinelerinden Fâtıma bt. Abdullah nâm hatun meclis-i şer‘-i hatîr-i lâzımü’t-tevkīrde zevci işbu râfi‘u’l-kitâb es-Seyyid Mustafa Çelebi b. es-Seyyid Mehmed mahzarında ikrâr ve takrîr-i kelâm edip zevcim mezbûr es-Seyyid Mustafa Çelebi zimmetinde ma‘kūdün-aleyh olan bin akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere ve kendi yanımdan dahi sekiz yüz akçe bedel-i hul‘ verip mezbûr es-Seyyid Mustafa Çelebi ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl ve bedel-i hul‘ [134b] olan meblağ-ı mezbûr sekiz yüz akçeyi yedimden ahz u kabz etmeğin zevciyete müte‘allika cemî‘ da‘vâdan her birimiz âharın zimmetini ibrâ ve ıskāt eyledik dedikde mukırre-i merkūmenin minvâl-i muharrer üzere cârî ve sâdır olan ikrâr-ı meşrûhunu merkūm es-Seyyid Mustafa Çelebi bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu.

Fi’l-yevmi’l-hâmis min-Zilhicceti’ş-şerîfe li-sene isneteyn ve seb‘în ve elf.

Şuhûdü’l-hâl: es-Seyyid Mehmed Çavuş b. es-Seyyid Hasan em-mübâşir, Baba Rasûl b. Rıdvan, Mehmed b. Ramazan, Abdülkerim b. Halil.