İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 808 Hüküm no: 981 Orijinal metin no: [134b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hacı Mehmed Çelebi b. Hamid’in kavukçu taifesine kethuda tayin olunduğu Mahmiye-i İstanbul’da kavukçular hirfeti ahâlîsinden Mehmed Çelebi b. Mustafa ve Mustafa Çelebi b. Mehmed ve Mustafa Çelebi b. Siyavuş ve Mehmed Çelebi b. Süleyman ve Şaban Bey b. Musa ve Hüseyin Çelebi b. Ebûbekir ve Ali Çelebi b. Mehmed ve el-Hâc Ali b. Mehmed ve el-Hâc Yusuf [b.] Abdullah ve Mustafa Çelebi b. Mehmed ve Mustafa Bey b. Salih ve es-Seyyid Halil Çelebi b. es-Seyyid Hasan ve Abdülbaki Çelebi b. İbrahim ve Muharrem Çelebi b. Mustafa ve Ali Beşe b. İbrahim ve Mustafa Çelebi b. Mehmed, es-Seyyid Hüseyin Çelebi b. es-Seyyid Mehmed ve Mehmed Çelebi b. Ali ve Ali Çelebi b. el-Hâc Veli ve Ahmed Çelebi b. Ali ve Süleyman Çelebi b. Osman ve Mustafa Çelebi b. Ömer ve el-Hâc Mustafa b. Mehmed ve Ebûbekir Çelebi b. Abdurrahman ve Mehmed Çelebi b. Mustafa ve sâirleri cemm-i gafîr meclis-i şer‘-i hatîr-i lâzımü’t-tevkīrde hâfızü’l-kitâb es-Seyyid el-Hâc Mehmed Çelebi b. es-Seyyid Hâmid mahzarında her biri takrîr-i kelâm edip mezbûr es-Seyyid el-Hâc Mehmed Çelebi sekiz seneden beri târih-i kitâba gelince kethudâmız olup beynimizde vâki‘ olan husûsları görüp gözetmekde ziyâde tekayyüd [ve] ihtimâm edip kavlinden ve fi‘ilinden her birimiz râzı ve şâkir bulunduğu hizmetinin uhdesinden [gelmeğe kādir] âdemdir cümlemizin muhtârıdır hirfet-i merkūmenin kethudâlığına kemâ-hüve hakkuhû ancak mezbûr kādirdir mezbûrdan mukaddem kethudâ olanlar hizmet-i merkūmeyi görmeğe kādir olmayıp az zamanda hiyâneti zuhûr etmişdir ve’l-hâsıl min-ba‘d mezbûrdan gayrı kimesnenin kethudâ olduğuna rızâmız yokdur dediklerinde mezbûrûnun mesûllerine muvâfık olunup mezbûr es-Seyyid Mehmed Çelebi hirfet-i merkūme ashâbına kemâ-kân savb-ı şer‘den kethudâ nasb olundukda ol dahi kabûl ve hizmet-i lâzımesini edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin Efendi el-kâtib, Keşfî Mustafa Efendi el-kâtib, Ahmed Çelebi b. Mahmud kethudâ-yı muhzırân, Abdi Çelebi b. Hüseyin, Şükrullah b. Mustafa.