İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 809 Hüküm no: 982 Orijinal metin no: [134b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ali Kapudan b. Ramazan Kapudan’ın Efrenc asıllı cariyesi Şâkire’yi azat ettiği Itknâme. Mahmiye-i Galata muzâfâtından mahmiye-i Kasımpaşa’da Sirkeci Muslihiddin mahallesi sâkinlerinden Mehmed Ali Kapudan b. Ramazan Kapudan nâm kimesne meclis-i şer‘-i hatîr-i lâzımü’t-tevkīrde kendiye rıkkıyetini mu‘terife olan işbu sahibetü’l-kitâb orta boylu açık kaşlı kara gözlü esmerü’l-levn Efrenciyyetü’l-asl Şâkire bt. Abdullah mahzarında ikrâr-ı sahîh-i şer‘î ve i‘tirâf-ı sarîh-i mer‘î edip ıtk-ı rakabâtı a‘zam-ı kurabât ve ulüvv-i derecât ve sebeb-i duhûl-i cennât-ı âliyât olduğundan gayrı mu‘takın ıtkı mukābelesinde mu‘takın uzvu nârdan âzad olduğu hadîs-i şerîfin mefhûm-ı münîfine muttali‘ olduğum hâlde mezbûre Şâkire[‘yi] mâlımdan âzad ve mülkümden ihrâc ve sâir harâ’ir-i asliyât silkine ilhâk ve idrâc eyledim ba‘de’l-yevm mezbûre Şâkire sâir harâ’ir-i asliyât gibi hürre olup üzerine hakk-ı velâdan gayrı hakkım kalmadı dedikde mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Seydi Kapudan b. Ramazan, Abdurrahman Çelebi b. Ramazan, Monla Ömer b. Mustafa, Mehmed b. Abdullah, Mustafa b. Mehmed.