İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 810 Hüküm no: 983 Orijinal metin no: [135a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hızır Beşe b. Şaban’ın Diyalahti bt. Salamon’da olan alacağı hususunda varislerinin yirmi guruş üzerine sulh olduğu Sulh. Mahmiye-i İstanbul’da Elvan mahallesinde sâkin iken bundan akdem fevt olan Hızır Beşe b. Şaban’ın verâseti zevce-i metrûkesi Fâtıma bt. Mustafa’ya ve babası mezbûr Şaban’a ve sulbî sagīr oğlu Mustafa’ya ve sulbiye sagīre kızı Hamide’ye münhasıra olduğu şer‘an zâhir ve müte‘ayyin oldukdan sonra mezbûre Fâtıma asâleten ve kendi tarafından asîl ve sagīretân-ı mezbûretânın kıbel-i şer‘den mansûb vasîleri olan mezbûr Şaban tarafından husûs-ı âti’z-zikre vekîl-i sâbitü’l-vekâlesi olan oğlu Mehmed vekâleten meclis-i şer‘de Diyalahti bt. Salamon muvâcehesinde asâleten ve vekâleten ikrâr ve i‘tirâf edip müteveffâ-yı mezbûr Hızır Beşe’nin merkūm ve Diyalahti zimmetinde deyn-i şer‘îden altmış riyâlî guruş hakkı olup kable’l-ahz fevt olmağla meblağ-ı mezbûr veresesine isâbet ve intikāl etmeğin meblağ-ı mezbûru asâleten ve vekâleten Diyalahti’den bundan akdem da‘vâ ve taleb eylediğimizde ol dahi husûs-ı mezbûru bi’l-külliye inkâr edip biz dahi müdde‘âmızı ityâna kādir olmayıp mezbûr Diyalahti yemîn sadedinde iken sulh sagīretân haklarında her vechile enfa‘ ve ahrâ olmağın mezbûr Diyalahti bizimle meblağ-ı mezbûrdan yirmi bir guruş üzerine sulh oldukda biz dahi sulh-ı mezbûru kabûl ve bedel-i sulh olan meblağ-ı mezbûru mezbûre yedinden asâleten ve vekâleten ahz u kabz eyledik dediklerinde gıbbe’t-tasdîk mezbûr Mehmed meclis-i şer‘de takrîr-i kelâm edip eğer müvekkilim mezbûr Şaban vekâletimi inkâr edip meblağ-ı mezbûrdan hissesini taleb ederse ben zâmin oldum dedikde mâ-vaka‘a bi’t-taleb ketb olundu. Fi’l-yevmi’t-tâsi‘ min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Musa Çavuş b. Abdullah, Abdi b. Hüseyin, Mehmed b. Ramazan, Şükrullah b. Mustafa, Ahmed Çelebi b. Mahmud.