Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 245 Hüküm no: 270 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani ve Râbia’nın vefat eden anneleri Ayşe’den intikal eden menzil hisselerini diğer bir varis olan kardeşleri Hanife’ye satmaları Mâ-fîhi mine’l-mübâya‘ati’ş-şer‘iyyeti’l-mer‘iye cerâ ledeyye’l-fakīr ileyhi te‘âlâ Mahmiye-i İstanbul’da Kalenderhane mahallesinde sâkine iken bundan akdem vefât eden Âişe bt. Mustafa nâm hatunun verâseti sadriye kebîre kızları Ümmühani ve Hanife ve Râbia’ya münhasıra olduğu şer‘an sâbit oldukdan sonra mezbûrân Ümmühani ve Râbia taraflarından husûs-ı âti’l-beyâna vekîl olup vekâleti mahalle-i mezbûre sükkânından zâtlarını ma‘rifet-i şer‘iyye ile ârifân Pir Mehmed ve Musli Beşe b. Mustafa nâm kimesneler şehâdetleri ile şer‘an sâbite olan mezbûre Râbia’nın zevci olan Ömer b. Mahmud nâm kimesne meclis-i şer‘-i şerîfde bâ‘isetü’l-kitâb mezbûre Hanife’nin zevci ve tarafından husûs-ı âti’l-beyâna vekîl olup zâtını ma‘rifet-i şer‘iyye ile âri[fân] şâhidân-ı mezbûrân şehâdetleri ile şer‘an sâbite olan Ali Bey b. Halil nâm kimesne mahzarında bi’l-vekâle ikrâr edip müteveffât-ı mezbûrenin terekesinden olup mahalle-i mezbûrede vâki‘ bir tarafdan Su kemeri ve bir tarafdan Hulvânî? Tekyesi ve bir tarafdan Hamamcı Ahmed mülkü ve bir tarafdan tarîk-i âm ile mahdûd fevkānî yan yana iki bâb oda ve bir kenîf ve tarîk-i âm tarafından tahtânî bir bâb dükkânı müştemil menzilden üç sehmden müvekkilelerim mezbûretân Ümmühani ve Râbia’dan her biri hissesi olan bir sehmi müvekkile-i mezbûre Hanife’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile yüzkırk esedî guruşa bey‘ ve teslîm müvekkilem mezbûre Hanife dahi iştirâ ve tesellüm etdiğinden sonra herbiri semen-i mezbûr yüz kırk esedî guruşu müvekkile-i mezbûre Hanife yedinden ahz u kabz eylediler, min-ba‘d menzil-i mahdûd-ı mezbûr irsen ve şirâen müvekkile-i mezbûre Hanife’nin müstakılleten mülk ve hakkıdır keyfe mâ yeşâ ve yahtâr mutasarrıfe olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Recebi’l-ferd li-sene 1081. Şuhûdü’l-hâl: Nakilbend Musli b. Mustafa, Ömer Ağa b. Ahmed, İlyas Çelebi b. Mehmed, İsmail Efendi b. Receb el-imâm.