İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 810 Hüküm no: 984 Orijinal metin no: [135a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Bedros’un Bogasicı Avanoz zimmetinde olan alacağının tahsili için varisleri tarafından Papa Asvador v. Sefer’in vekil tayin edildiği Vekâlet . Mahmiye-i İstanbul’da Sinan Ağa mahallesinde sâkin iken bundan akdem hâlik olan Bedros nâm Ermeni’nin verâseti sulbî kebîr oğulları Anenya ve Rimya nâm Ermenilerile sulbiye kebîre kızları Meryem ve Markar va Gonca nâm Ermenilere münhasıra olduğu şer‘an zâhir ve müte‘ayyin oldukdan sonra mezbûr Anenya asâleten ve merkūm Rimya kendi tarafından asâleten ve kız karındaşları mezbûrât taraflarından husûs-ı câ’i’z-zikre vekîl olup Boğaz v. Taranoz ve Serkiz v. Minas nâm Ermeniler şehâdetleriyle şer‘an vekâleti sâbite olmağın vekâleten meclis-i şer‘-i hatîr-i lâzımü’t-tevkīrde işbu hâmilü’s-sifr Papa Asvador v. Sefer muvâcehesinde her biri asâleten [ve] vekâleten ikrâr ve takrîr-i kelâm edip babamız hâlik-i mezbûrun gāib ani’l-meclis Bogasicı Avanoz nâm Ermeni zimmetinde deyn-i şer‘îden üç yüz yetmiş kıt‘a esedî guruş hakkı olup ba‘de helâkihî meblağ-ı mezkûr terekesinden olmağla bize ve kızları mezbûrâta intikāl etmeğin mezkûrun bi’l-farîzati’ş-şer‘iye her birimize isâbet eden hisse-i şer‘iyelerimizi da‘vâ ve taleb ve ahz u kabza ve bize îsâle ve kabz [ve] îsâl[in] mütevakkıf olduğu umûrun cümlesine mezbûr Papa Asvador’u asâleten ve vekâleten vekîl nasb ve ta‘yîn eylediğimizde ol dahi vekâlet-i mezbûreyi kabûl ve hizmet-i lâzımesini edâya ta‘ahhüd eyledi dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilhicceti’ş-şerîfe [li]-sene 1072. Şuhûdü’l-hâl: Seyyid Mehmed Çelebi b. Seyyid Hasan, el-Hâc Ahmed b. Mahmud kethudâ-yı muhzırân, Abdi Çelebi b. Hüseyin, Şükrullah b. Mustafa, Mustafa Çelebi b. İsa.