İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 811 Hüküm no: 985 Orijinal metin no: [135a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Konya eski kadısı Hüseyin Efendi b. Abdülhalim’in kendisinde alacağı olmadığına dair Şükrullah Efendi b. Abdullah’ın yemin ettiği Mahmiye-i İstanbul’da Ali Paşa-yı Atîk mahallesinde sâkin olup sâbıkā Konya kādısı olan umdetü’l-mevâli’l-kirâm Hüseyin Efendi b. Abdülhalim tarafından husûs-ı âti’z-zikre vekîl olup Hüseyin Efendi b. Şaban ve Abdurrahman b. Murtaza nâm kimesneler şehâdetleriyle şer‘an vekâleti sâbite olan Ramazan Efendi b. Şaban meclis-i şer‘-i hatîrde işbu râfi‘u’l-kitâb Şükrullah Efendi b. Abdullah mahzarında bi’l-vekâle üzerine da‘vâ ve takrîr-i kelâm edip müvekkil-i mûmâ-ileyh Hüseyin Efendi’nin karz-ı şer‘îden merkūm Şükrullah Efendi zimmetinde yüz elli riyâlî guruş hakkı vardır suâl olunup müvekkilim için alıverilmek matlûbumdur gıbbe’s-suâl mezbûr Şükrullah Efendi cevâbında vekîl-i mezbûrun cümle müdde‘âsını inkâr edicek vekîl-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin müvekkil-i müşârün-ileyhden karz-ı şer‘îden zimmetinde yüz elli riyâlî guruş deyni olmadığına mezbûr Şükrullah Efendi’ye yemîn teklîf olundukda ol dahi alâ-mâ hüve’l-mesûl halfü billâhi’l-aliyyü’l-azîm etmeğin bilâ-beyyine müvekkil-i mezbûr mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Zilhicceti’ş-şerîfe li-sene 1072. Şuhûdü’l-hâl: Fahrü’l-mevâliyi’l-izâm es-Seyyid Mehmed Efendi, Ahmed Çavuş b. Abdülkerim, Hüseyin Efendi, el-Hâc Ahmed b. Mahmud.