İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 813 Hüküm no: 987 Orijinal metin no: [135b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya b. Abdullah’ın kaybolduktan sonra Dilaver b. Abdullah’ta bulunan sırmalı kuşağının kendisine iadesi Mahmiye-i İstanbul’da Sahanlı Hamam kurbünde sâkin Yahya b. Abdullah mahfil-i kazâda Dilaver b. Abdullah nâm kimesne mahzarında üzerine da‘vâ ve takrîr-i kelâm edip târih-i kitâbdan on beş gün mukaddem işbu sırmalı kolan kuşağım mülkümden zâyi‘ olup mezbûr Dilaver yedinde buldum hâlâ taleb eylediğimde vermede ta‘allül eder suâl olunsun dedikde gıbbe’s-suâl mezbûr Dilaver cevâbında işbu kuşağı Bit Bâzârı’nda bir avrat yedinden üç yüz yirmi akçeye iştirâ eyledim mezbûr Yahya’nın olduğu ma‘lûmum değildir deyicek müdde‘î-i mezbûrdan müdde‘âsını mübeyyine beyyine taleb olundukda mahalle-i mezbûre sâkinlerinden Mustafa Beşe b. Mahmud ve Belkıs bt. Abdullah ve Âişe bt. Musa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu sırmalı kolan kuşak müdde‘î-i mezbûrun mülkü olup mülkünde iken on beş gün mukaddem mülkünden zâyi‘ olmuşdur biz bu husûsa bu vech üzere şâhidleriz şehâdet dahi ederiz [deyü] her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle oldukdan sonra zikrolunan kuşak âhara bey‘ veyâ hîbe ve vücûh-ı şer‘iyeden bir tarîk ile mülkünden ihrâc etmediğine mezbûr Yahya’ya yemîn teklîf olundukda ol dahi alâ-vefki’l-mesûl yemîn billâhi te‘âlâ etdikden sonra mûcebince zikrolunan kuşağı müdde‘î-i mezbûra teslîme mezbûr Dilaver’e tenbîh birle mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Abdi b. Hüseyin, Rasûl b. Rıdvan, Mustafa b. Mehmed, Mehmed b. Ramazan, Hüseyin b. Ebûbekir ve gayruhum.