İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 813 Hüküm no: 988 Orijinal metin no: [136a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Abdullah tarafından Hurdacılar sokağındaki musluğa su getirilmek üzere yüz riyâlî guruş vakfedildiği Mahmiye-i İstanbul’da Sultan Bâyezid Câmi‘-i şerîfi kurbünde Hurdacılar sokağında sâkin olup vakf-ı câ’i’z-zikre hasbî nâzır olan el-Hâc Ömer b. Abdullah nâm kimesne meclis-i şer‘-i hatîrde sâbıkā ber-mûceb-i şart-ı vâkıfe vakf-ı mezbûra mütevellî olup vefât eden Ahmed Efendi’nin sulbî kebîr oğlu ve hâlâ vakf-ı mezbûra mütevellî olan Abdurrahman Efendi mahzarında üzerine bi’n-nezâre da‘vâ ve takrîr-i kelâm edip merhûme Âişe Hatun bt. Abdullah nâm sahibetü’l-hayrın sûk-ı mezbûrede vaz‘ eylediği musluğun suyu için yüz riyâlî guruş vakf edip meblağ-ı mezbûru babası kabz edip hâl-i hayatında ol vakıfdan yedinde yüz riyâlî guruş olduğunu ikrâr ve beyne’l-Müslimîn istişhâd eyledikden sonra vefât edip yerine oğlu mezbûr mütevellî olmağın suâl olunup takrîri tahrîr olunmak murâdımdır dedikde gıbbe’s-suâl mezbûr Abdurrahman Efendi cevâbında babası yedinde mal-ı vakf-ı mezbûr mâlından ancak sekiz bin züyûf akçe olup ba‘de vefâtihî bi’t-tevliye kabz eyledim deyip yüz riyâlî guruşu olduğunu inkâr etmeğin müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı Müslimînden Abdullah b. Üveys ve Mustafa Beşe b. Osman nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mütevellî-i mezbûr Abdurrahman Efendi’nin babası müteveffâ-yı mezbûr Ahmed Efendi hâl-i hayatında mal-ı vakf-ı mezbûrdan zimmetimde vâcibü’l-edâ yüz riyâlî guruş deynim vardır deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şehâdetleri makbûle olmağın sûk-ı mezbûrede vaz‘ olunan musluğa her iki günde bir sakā şart-ı vâkıfe üzere su vaz‘ olunmasına ve meblağ-ı mezbûr yüz riyâlî guruşun ribhinden sakānın ücretini edâya mütevellî-i mezbûr Abdurrahman Efendi’ye tenbîh olunup mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Efendi b. Mahmud, İbrahim b. Bayram, İbrahim b. Süleyman, Mehmed b. Ali, el-Hâc Baba Hasan, Mehmed b. Abdullah.