İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 814 Hüküm no: 989 Orijinal metin no: [136a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Haçok’un babasının Verten’de olan alacağının oğlu Avanos tarafından ödenmesi Vilâyet-i Anadolu’da Eğin kazâsına tâbi‘ Abçuha nâm karye sükkânından işbu bâ‘isü’s-sifr Serkiz v. Haçok nâm Ermeni mahfil-i kazâda yine karye-i mezbûre sükkânından Avanos v. Verten nâm Ermeni muvâcehesinde üzerine da‘vâ ve takrîr-i kelâm edip babam mezbûr Haçok’un merkūm Avanos’un babası mezbûr Verten zimmetinde cihet-i deyn-i şer‘îden seksen kıt‘a riyâlî guruş hakkı olup meblağ-ı mezbûrdan kırk kıt‘a riyâlî guruşun mezbûr Verten yedinden ahz u kabz edip meblağ-ı bâkī kırk kıt‘a riyâlî guruşu kable’l-ahz babam mezbûr hâlik olup meblağ-ı mezbûr ırsen bana intikāl edip ben dahi meblağ-ı mezbûru kable’l-ahz mezbûr Verten dahi hâlik olup metrûkâtına mezbûr Avanos vâzı‘u’l-yed olmağla ben dahi meblağ-ı mezbûrun on guruşundan mezbûr Avanos’un zimmetini ibrâ edip meblağın otuz guruşunu hâlik-i mezbûrun merkūm Avanos yedinde olan terekesinden bundan akdem da‘vâ eylediğimde ol dahi meblağ-ı mezbûr otuz kıt‘a riyâlî guruş zimmetinde bana deyni olduğunu şuhûd-ı udûl katında kirâren ve mirâren ikrâr ve işhâd eylemiş iken hâlâ edâdan imtinâ‘ eder suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda yine karye-i mezbûre sükkânından Mıgırdıç v. Agob ve Haçok v. Balım nâm Ermeniler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Avanos bâlâda tafsîli mürûr etdiği üzere müdde‘î-i mezbûr Serkiz’e zimmetimde otuz kıt‘a riyâlî guruş deynim vardır deyü kirâren ve mirâren huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın mûcebince meblağ-ı mezbûr otuz kıt‘a riyâlî guruşu müdde‘î-i mezbûra edâ ve teslîme mezbûr Avanos’a tenbîh birle mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Ahmed Çeleb [b.] Mahmud, Abdi Çelebi b. Hüseyin, Baba Rasûl b. Rıdvan, Hasan b. Mustafa, Mehmed b. Ramazan, Ahmed b. Abdülcabbar.