.:: İstanbul Kadı Sicilleri ::.


İstanbul Mahkemesi 10 Numaralı Sicil (H. 1072-1073 / M. 1661-1663)
cilt: 51, sayfa: 815
Hüküm no: 990
Orijinal metin no: [136b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mustafa Ağa’nın Müteferrika Mehmed Ağa b. Abdullah ve Celeb Ali b. Mehmed’de olan alacağını tahsil ettiği

Bi’l-fi‘il reisü’l-mü’ezzinîni’s-sultanî olan fahrü’l-emâcid ve’l-emâsil Mustafa Ağa tarafından husûs-ı âti’z-zikre vekîl olup nehc-i şer‘î ve vech-i mer‘î üzere vekâleti sâbite olan fahru erbâbü’t-tahrîr ve’l-kalem Yusuf Efendi b. Abdullah meclis-i şer‘-i hatîrde işbu hâfızeyi’l-kitâb Müteferrika Mehmed Ağa b. Abdullah ve Celeb Ali b. Mehmed mahzarlarında bi’l-vekâle ikrâr ve takrîr-i kelâm edip bin yetmiş bir Mart’ı ibtidâsından bir sene tamamına dek mahmiye-i mezbûrede âsûde merhûm ve mağfûrun-leh Sultan Selim Han -tâbe serâhu- Evkāfı’ndan olup müvekkilimin der-uhde eylediği Akkirman cibâyeti vekâlet-i mahkiyem hasebiyle mezbûrân Mehmed ve Ali Ağa’ya altı yük akçeye der-uhde edip onlar dahi cibâyet-i mezbûreyi iltizâm ve kabûl eyledikden sonra sene-i mezbûreyi tamamem zabt ve mahsûlâtını ahz u kabz eyledikden sonra taht-ı iltizâmlarında olan meblağ-ı mezbûru kabza vekîl olan hazır bi’l-meclis Musa Bey b. Ali yedinden şirâen kırk bin akçesi ve hazır bi’l-meclis Helvâcı Ali Bey yedinden dahi altmış bin akçesi ki cem‘an mezbûrân Mehmed Ağa ve Ali Ağa’nın sene-i mezbûrede der-uhde etdikleri altı yük akçe tamamen bana vâsıl olmağın yedlerinde meblağ-ı mezbûrdan bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu.

Fi’l-yevmi’r-râbi‘ aşer min-Zilhicceti’ş-şerîfe li-sene isneteyn ve seb‘în ve elf.

Şuhûdü’l-hâl: Bosnevî Mehmed Bey, Ali Bey b. Mehmed, Abdi b. Hüseyin, Veli b. Mahmud, Ahmed b. Ali.