İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 822 Hüküm no: 1001 Orijinal metin no: [138a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cennet bt. Ali’nin muhâlaa yoluyla kocası Hacı Ahmed b. Mehmed’den boşandığı ve birbirlerinin zimmetlerini ibra ettikleri Medîne-i Galata’ya tâbi‘ kasaba-i Tophâne’de Cihangir câmi‘i kurbünde sâkine Cennet bt. Ali nâm hatun meclis-i şer‘-i hatîr-i lâzımü’t-tevkīrde hâfızü’l-kitâb el-Hâc Ahmed b. Mehmed mahzarında tav‘an ikrâr ve takrîr-i kelâm edip mezbûr el-Hâc Ahmed mukaddemâ zevcim olup zimmetinde mütekarrir ve ma‘kūdün-aleyh bin beş yüz akçe mehr-i mü’eccelimin beş yüz akçesini yedinden alıp kabz eyledikden sonra bâkī kalan sekiz bin akçe nafaka-i iddet-i ma‘lûmem ve me’ûnet-i süknâm üzerlerine mezbûr el-Hâc Ahmed ile muhâla‘a-i sahîha-i şer‘iye ile muhâla‘a eylediğimde ol dahi hul‘-ı mezbûru kabûl edip zevciyete müte‘allik da‘vâdan her birimiz âharın zimmetinin ibrâ-i âm ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: İmâm Hüseyin Efendi b. Muharrem, Hüseyin Çavuş el-mübâşir, Müezzin Mehmed Halîfe b. Mehmed, Esad Efendi b. Hasan, İsmail Beşe b. Mustafa, Osman Efendi b. Abdullah, Hüseyin Efendi el-Burûsî.