İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 822 Hüküm no: 1002 Orijinal metin no: [138a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın herhangi bir eşyasını almadığına dair boşandığı kocası Mustafa b. Veli’nin yemin ettiği Mahmiye-i İstanbul’da Balat Kapısı kurbünde sâkine Hadîce Hatun bt. Abdullah meclis-i şer‘-i hatîrde zevc-i mutallıkı işbu râfi‘u’l-kitâb Mustafa b. Veli mahzarında üzerine takrîr [ve] da‘vâ edip mezbûr Mustafa zevcim olup târih-i kitâbdan bir sene mukaddem Yedikule kurbünde sâkine iken beni tatlîk etmezden akdem mezbûr Mustafa ile beynimizde zevciyet kāime iken silk-i mülkümde olan otuz miskāl bir çift altın bilezik ve bir sîm ön kuşak ve bir sırmalı takyemi ahz u kabz eylemeğin mezbûr Mustafa’dan taleb ederim suâl olunsun dedikde gıbbe’s-suâl mezbûr Mustafa cevâbında müdde‘iye-i mezbûre Hadîce mukaddemâ zevcesi olup tatlîk eylediğini ikrâr edip lâkin kable’t-tatlîk mezbûrenin mülkü olan eşyâ-i merkūmeyi ahz u kabzını inkâr edicek müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acziyle istihlâf eylemeğin fi’l-vâki‘ müdde‘iye-i mezbûrenin mülkünde olan eşyâsından bir çift altın bilezik ve bir sîm ön kuşak ve sırmalı takyesini ahz u kabz etmediğine mezbûr Mustafa’ya yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince mezbûre Hadîce bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Mehmed Efendi b. Mustafa imâm, Hacı Zeynüddin b. Bayram, Hacı Kenan b. Şit, Şükrullah b. Mustafa, Mustafa Çelebi b. Salih el-müezzin, Mehmed Çelebi el-müezzin, Mustafa Çelebi b. İlyas.