İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 823 Hüküm no: 1003 Orijinal metin no: [138b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mütevellisinin kendi malıyla tamir ettirdiği Emin Nureddin Vakfı’na ait binalar keşfolunduğunda 121.118 akçelik iş yapılmış olduğunun tespit edildiği Mahmiye-i İstanbul’da merhûm Emin Nureddin Vakfı’na hâlâ mütevellî olan işbu râfi‘u’l-kitâb Mustafa Efendi b. Mehmed meclis-i şer‘-i hatîrde hâzırân bi’t-tevliye takrîr-i kelâm ve bast-ı merâm edip mütevellîsi olduğu vakf-ı mezbûrun mahmiye-i mezbûrede Şehzâde Câmi‘-i Şerîfi haremine muttasıl mescidinin sakfı ve minâre külâh ve pencereleri camları ve mescid hareminde vâki‘ mektebi bin yetmiş senesi Zilka‘de’sinde vâki‘ harîk-i kebîrde muhterik olduğu ecilden bi’l-izn aldığı mal-ı vakfı müceddeden binâ ve imâret etmiş idim. Savb-ı şer‘den üzerine varılıp masrûfumun mertebe-i tahammülü tahmîn ve takvîm olunmak bi’t-tevliye matlûbumdur dedikde kıbel-i şerî‘at-i mergūbeden Mevlânâ Mehmed Efendi b. Mahmud irsâl olunup ol dahi hâssa mi‘mârlardan Üstâd el-Hâc Hasan b. Ömer ve ebniye ve sukūf ahvâline vukūf [ve] şu‘ûru olup zeyl-i vesîkada isimleri mastûr olan Müslimîn ile üzerine varılıp nazar eylediklerinde fi’l-vâki‘ mütevellî-i mezkûr vech-i muharrer üzere müceddeden binâ ve imâret mukarrer oldukdan sonra mi‘mâr-ı mezbûr mesâha ve takvîm eyledikde tûlen on altı, arzan on üç be-hesâb-ı şatrancî iki yüz sekiz zirâ‘ sakf-ı mescid zirâ‘ı seksener akçeden on altı bin altı bin altı yüz kırk akçe ve tûlen on bir ve arzan on bir be-hesâb-ı mezkûr yüz yirmi bir zirâ‘ tavan zirâ‘ı ellişer akçeden altı bin elli akçe ve tûlen yirmi bir arzan on dört be-hesâb-ı mezbûr iki yüz doksan dört zirâ‘ sakf zirâ‘ı seksener akçeden on dokuz bin beş yüz yirmi akçe ve tûlen on bir arzan altı be-hesâb-ı mezbûr altmış altı zirâ‘ tavan zirâ‘ı ellişer akçeden üç bin üç yüz akçe ve iki cevânibe trabzon (trabzan) sekiz yüz akçe ve sekiz pencere üçer yüz akçeden iki bin dört yüz akçe ve sekiz billûr cam üç yüzden iki bin dört yüz akçe ve beş cam teli ikişer yüzden bin akçe ve iki dolab altı yüz akçe ve bir kebîr Arabî kapı bin akçe ve yüz on parmaklık ki on ikişerden bin üç yüz yirmi akçe ve sâde kapı iki yüz akçe ve kırk sekiz ağa tahtası yirmişerden dokuz yüz altmış akçe ve iki trabzon üç yüz akçe ve dört sırça cam ikişer yüzden sekiz yüz akçe ve tûlen on iki arzan dokuz be-hesâb-ı mezkûr yüz sekiz zirâ‘ sakf-ı mekteb zirâ‘ı yetmişer akçeden yedi bin beş yüz altmış akçe ve tûlen on dört ve arzan dokuz be-hesâb-ı mezbûr yüz yirmi altı zirâ‘ sakf-ı mekteb zirâ‘ı yetmişer akçeden sekiz bin sekiz yüz yirmi akçe ve tûlen altı ve kadden beş be-hesâb-ı mezbûr otuz zirâ‘ dolma duvar zirâ‘ı ellişer akçeden bin beş yüz akçe ve tûlen sekiz arzan yedi be-hesâb-ı mezbûr elli altı zirâ‘ tavan-ı mekteb zirâ‘ı ellişer akçeden iki bin sekiz yüz akçe ve tûlen yedi arzan yedi be-hesâb-ı mezbûr kırk dokuz zirâ‘ tavan-ı mekteb zirâ‘ı ellişer akçeden iki bin dört yüz elli akçe ve tûlen yedi arzan yedi be-hesâb-ı mezbûr kırk dokuz zirâ‘ tahta döşeme zirâ‘ı ellişer akçeden iki bin dört yüz elli akçe ve tûlen beş kadden dört be-hesâb-ı mezbûr yirmi zirâ‘ dış duvar zirâ‘ı kırkar akçeden sekiz yüz akçe ve iki pencere ikişer yüzden dört yüz akçe ve iki dolab üçer yüzden altı yüz akçe ve iki mertebe iki yüz akçe ve bir kebîr ocak sekiz akçe ve üç kapı üç yüzden dokuz yüz ve bir mekteb kapısı beş yüz akçe ve tûlen dokuz arzan dört buçuk be-hesâb-ı mezbûr kırk buçuk zirâ‘ sakf zirâ‘ı altmış akçeden iki bin dört yüz otuz akçe ve be-hesâb-ı mezkûr yirmi zirâ‘ dış duvar zirâ‘ı kırkar akçeden sekiz yüz akçe ve elli sekiz vakıyye cedîd demir pencere vakıyyesi yirmi üçer akçeden bin üç yüz seksen akçe ve yedi dış sura bin dört yüz elli akçe ve on demir çenber bin akçe ve on iki kebîr tavan dört yüzden dört bin sekiz yüz akçe ve zincir sekiz yüz elli akçe ve ücret-i badana altı yüz elli akçe ve bir minâre külâh-ı hadîd beş bin akçe ve tûlen elli beş kadden sekiz be-hesâb-ı mezkûr dört yüz kırk zirâ‘ mescidin sıva-i cedîdi zirâ‘ı on akçeden dört bin dört yüz akçe ve mescid ve mekteb zemînini tahliye için ırgādâna iki bin akçe ki cem‘an yüz yirmi bir bin yüz on sekiz akçe ile ancak binâ ve imâret mümkündür bundan ekall ve noksanla kābil ve mümkün değildir deyü mi‘mâr-ı mezbûr ve sâir Müslimûn icmâ‘ ve ittifâk eyledikleri mevlânâ-yı mezkûr mahâllinde ba‘de’t-tahrîr ma‘an ba‘s olan Mustafa b. Ali ve Ahmed Çelebi b. Yusuf ile meclis-i şer‘a gelip şer‘le alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Hacı Mustafa b. Abdullah, Ömer Çavuş b. Mehmed, Veli Ağa b. Maksûd, Hacı Muharrem b. Veli, Hacı Bali b. Veli, Mustafa Çelebi. Ahmed, Hüseyin Bey b. Mehmed, Ahmed Efendi b. Mehmed el-imâm, Ömer Beşe b. Musa, Ahmed Halîfe b. Muharrem.