İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 824 Hüküm no: 1004 Orijinal metin no: [139a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki papuç, mest ve çizme dikiciler taifesi üzerine Üstâd Osman b. Mustafa’nın yiğitbaşı tayin edildiği Mahmiye-i İstanbul’da papuç ve mest ve çizme dikicileri tâifesinin ihtiyârlarından Mustafa b. Mehmed ve Receb b. Mehmed ve Mustafa b. Şaban ve Receb b. Ahmed ve İbrahim b. Hüseyin ve Mehmed b. Ahmed ve sâirleri meclis-i şer‘-i hatîrde sâbıkā dikicibaşı olan işbu sahibü’l-kitâb Üstâd Osman b. Mustafa mahzarında her biri takrîr-i kelâm edip mezbûr Üstâd Mustafa birkaç sene mukaddem dikicibaşı olup uhdesinden gelmeğe kādir ve hirfet-i mezbûre ahâlîsi merkūmdan râzı ve şâkir ve her vechile dikicibaşılık hizmetine lâyık ve cümlemizin muhtârı olmağla kıbel-i şer‘den kemâ-kân üzerimize yiğitbaşı nasb olunmak matlûbumuzdur dediklerinde fi’l-vâki‘ Osman erbâb-ı hirfet-i mezbûrenin muhtârı olmağla vech-i muharrer üzere kıbel-i şer‘den mezbûr Osman ke’l-evvel yiğitbaşı nasb olundukda ol dahi kabûl ve hidemâtını edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Fahrü’l-akrân Mehmed Ağa b. Mahmud muhzırbaşı, Fahrü’l-emâsil Mehmed Ağa b. ( ) kethudâ efendi, Çukadâr Ramazan b. Hürrem, el-Hâc Ahmed b. Mahmud.