İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 825 Hüküm no: 1005 Orijinal metin no: [139a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mütevellinin vakfın malıyla yeniden yaptırdığı Manisalı Çelebi Vakfı’na ait menzil keşfolunduğunda 33.562 akçelik iş yapılmış olduğunun tespit edildiği Mahmiye-i İstanbul’da merhûm ve mağfûrun-leh Magnisalı Çelebi Vakfı’ndan hâlâ mütevellî olan işbu râfi‘u’l-kitâb fahrü’l-a‘yân el-Hâc Ahmed Ağa b. Hasan meclis-i şer‘-i hatîrde bi’t-tevliye takrîr-i kelâm edip merhûm-ı mezkûrun mahmiye-i mezbûrede Etpazarı’nda vâki‘ mescid-i şerîfinde imâm olanlara süknâsı meşrûta olur mescid-i mezbûr kurbünde vâkıfeye intimâ ile tahdîd ve tavsîfden müstağnî vakıf menzil bin yetmiş senesi Zilka‘de’sinde vâki‘ harîk-i kebîrde bi’l-külliye muhterik olmağla bi’l-izni’ş-şer‘î mal-ı vakıfla ke’l-evvel müceddeden binâ ve imâret etmiş idim savb-ı şer‘den üzerine varılıp masrûfumun mertebe-i tahammülü tahmîn ve takvîm olunmak bi’t-tevliye matlûbumdur dedikde kıbel-i şerî‘at-i mutahharadan Mevlânâ Mehmed Efendi b. Mahmud irsâl olunup ol dahi hâssa mi‘mârlardan Üstâd el-Hâc Hasan b. Ömer ve ebniye ve sukūf ahvâline vukūf ve şu‘ûru olup zeyl-i vesîkada isimleri mastûr olan Müslimîn ile üzerine varılıp nazar eylediklerinde fi’l-vâki‘ mütevellî-i mezbûr menzil-i mezkûru müceddeden binâ eylediği mukarrer oldukdan sonra mi‘mâr-ı mezbûr menzil-i mezbûr-ı mesfûru mesâha eyledikde tûlen otuz iki kadden dört be-hesâb-ı şatrancî yüz yirmi sekiz zirâ‘ dolma duvar zirâ‘ı kırkar akçeden beş bin yüz yirmi akçe ve tûlen on altı arzan yedi be-hesâb-ı mezbûr on iki zirâ‘ tahta döşeme zirâ‘ı kırkar akçeden dört bin dört yüz seksen akçe ve tûlen yedi arzan altı be-hesâb-ı mezbûr kırk iki zirâ‘ tavan zirâ‘ı kırkar akçeden bin altı yüz seksen akçe ve bir ocak sekiz yüz akçe ve bir dolab iki yüz akçe ve dört billûr cam yüz onar akçeden dört yüz kırk akçe ve bir masandra sekiz yüz akçe ve tûlen on iki kadden üç be-hesâb-ı mezbûr otuz altı zirâ‘ tahta perde zirâ‘ı yirmi beşer akçeden sekiz yüz akçe ve yüz sekiz haydarî tahta altışardan altı yüz kırk sekiz akçe ve yirmi bir tahta-i kocaman on altışardan üç yüz otuz altı akçe ve tûlen on beş arzan on be-hesâb-ı mezkûr yüz elli zirâ‘ sakf zirâ‘ı ellişer akçeden yedi bin beş yüz akçe ve bir nerdübân ma‘a kepenek ve sahn sekiz yüz akçe ve tûlen yirmi üç kadden dört be-hesâb-ı mezkûr doksan iki zirâ‘ dış duvar zirâ‘ı otuzar akçeden iki bin yedi yüz altmış akçe ve tûlen on bir kadden dört be-hesâb-ı mezbûr kırk dört zirâ‘ dolma duvar zirâ‘ı otuzar akçeden bin üç yüz yirmi akçe ve bir matbah ocağı bin akçe ve bir dolabı ki yüz ve iki pencere iki yüz ve bir masandra beş yüz ve iki sırça cam yüzerden iki yüz akçe ve bir kemer kapı iki yüz akçe ve bir bâb kapı yüz elli akçe ve bir kenîf sekiz yüz akçe ve bir sokak kapısı beş yüz akçe ki cem‘an otuz üç bin beş yüz altmış iki akçe ile ancak binâ ve imâret olur ve bundan ekall ve noksan ile kābil [ve] mümkün değildir deyü mi‘mâr-ı mezbûr ve sâir Müslimûn icmâ‘ ve ittifâk eylediklerin mevlânâ-yı mezbûr mahâllinde ba‘de’t-tahrîr ma‘an ba‘s olunan Mustafa b. Ali ile meclis-i şer‘a gelip vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbi‘ min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Mustafa Efendi b. Mehmed, Mehmed Çelebi b. Mehmed, Mustafa Çelebi b. Mehmed, Ali Beşe b. Himmet, İsmail b. Murad.