İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 826 Hüküm no: 1006 Orijinal metin no: [139b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Veli’nin Rumeli eski kazaskeri Şaban Efendi’de olan alacağının vasîsi tarafından tahsil edildiği Husûs-ı âti’l-beyânın tahrîri iltimâs olunmağın savb-ı şer‘den irsâl olunan Bursevî Hüseyin Efendi mahmiye-i İstanbul’da Çukurhamam kurbünde sâkin olup a‘lemü’l-ulemâ’i’l-mütebahhirîn efdalü’l-fudalâi’l-müteverri‘în yenbû‘u’l-fezâyil ve’l-meâli metbû‘i’l-efâzıl ve’l-e‘âlî câmi‘ü’l-fürû‘ ve’l-usûl hâvi’l-mu‘addel ve’l-menkūl sâbıkā Rumeli kādıaskeri olan Şaban Efendi hazretleri menzil-i âlîlerine varıp zeyl-i kitâbda isimleri mastûr olan Müslimîn huzûrlarında akd eylediği meclis-i şer‘de mahmiye-i merkūmede Kalenderhâne mahallesinde sâkin olup mukaddemâ fevt olan Veli birâder-i Ahmed Ağa’nın sulbî sagīr oğlu İbrahim Ağa’nın kıbel-i şer‘den mansûb vasîsi olan Salih Bey b. Mehmed mûmâ-ileyh efendi hazretlerin huzûr-ı şerîflerinde ikrâr ve takrîr-i kelâm edip bundan akdem vasîsi olduğum sagīr-i mezbûr mâlından mûmâ-ileyh efendi hazretlerine ikrâz ve teslîm eylediğim yüz yirmi bin akçenin elli bin akçesini almış idim el-hâletü hâzihî bâkī kalan yetmiş bin akçesini dahi yedinden tamamen alıp kabz edip zimmetlerinde bir akçe ve bir habbe bâkī kalmadı dedikde gıbbe’t-tasdîkı’l-mu‘teber vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl olunan Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe lis-ene isneyn ve seb‘în ve elf. Şuhûdü’l-hâl: Umdetü’l-mevâliyi’l-izâm sâbıkā Kuds-i Şerîf Kādısı Altıparmak İbrahim Efendi, Fahrü’l-emâcid İshak Ağa b. Salih, Fahrü’l-eimme Mustafa Efendi [b.] Abdülmümin el-muhzır, Umdetü’l-emâsil ve’l-ayân Şaban Ağa b. İlyas.