İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 827 Hüküm no: 1007 Orijinal metin no: [139b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Arayil v. İlya’nın Elvanzâde mahallesindeki mülk arsasını Salih Ağa b. Abdullah’a sattığı Kiroz cemâ‘atinden Arayil v. İlya nâm Yahûdî meclis-i şer‘-i hatîr-i lâzımü’t-tevkīrde işbu bâ‘isü’l-kitâb fahrü’l-akrân Salih Ağa b. Abdullah mahzarında ikrâr ve takrîr-i kelâm edip mahmiye-i İstanbul’da Elvanzâde mahallesinde vâki‘ bir tarafdan Cihan Bey vakfı ve bir tarafdan Kapıcıbaşı Halil Ağa mülkü ve bir tarafda kale duvarı ve bir tarafdan tarîk-i âmla mahdûd olup tûlen yirmi iki ve arzan altı zirâ‘ mülk arsa-i hâliyemi yirmi bin nakd-i râyic fi’l-vakt akçeye mezbûr Salih Ağa’ya tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm edip ol dahi iştirâ ve tesellüm ve kabûl eyledikden sonra semeni olan meblağ-ı mezbûr yirmi bin akçeyi mezbûr Salih Ağa yedinden tamamen ahz u kabz eyledim ba‘de’l-yevm zikrolunan arsa-i mahdûde merkūm Salih Ağa’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Seyyid Süleyman Çelebi, Mustafa Ağa çaşnigir, Veli Çavuş b. Ahmed, Hüseyin b. Mustafa, Abdülbaki Çelebi, Hasan Efendi b. Ahmed el-müezzin, Veli b. Mahmud, Abdi b. Hüseyin, Şükrullah b. Mustafa.