İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 827 Hüküm no: 1008 Orijinal metin no: [139b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zobu bt. Rihan’ın tasarrufunda bulunan vakıf menzilin kullanım hakkını Panayot v. Piro’ya devri hususunda çıkan anlaşmazlıkta sulh olduğu Mahrûse-i Galata dâhilinde Sultan Bâyezid mahallesi sâkinelerinden Zobu bt. Rihan nâm Nasraniye meclis-i şerde işbu râfi‘u’s-sifr Panayot v. Piro nâm zimmî mahzarında ikrâr ve takrîr-i kelâm edip mahalle-i mezbûrede vâki‘ bir tarafı Yorgo nâm zimmî ve bir tarafı Sava nâm zimmî ve bir tarafı Komyenos nâm zimmî mülkleri ve bir tarafı tarîk-i âmla mahdûd olup icâreteyn-i ma‘lûmeteyn ile taht-ı tasarrufumda olup Emir Efendi Evkāfı’ndan bir bâb fevkānî ve bir bâb tahtânî beyti müştemil menzilimin hakk-ı tasarrufunu izn-i mütevellî ile on iki bin dört yüz akçe mukābelesinde mezbûr Panayot’a ferâğ ve tefvîz ol dahi tefevvüz ve kabûl eyledikden sonra meblağ-ı mezbûru yedinden ahz u kabz etmişimdir lâkin bey‘ bi’l-vefâ tarîki üzere rehin vaz‘ eyledim deyü mezbûr Panayot’dan da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vâki‘ olmuş idi el-hâletü hâzihî beynimize muslihûn ve Müslimûn tavassut edip beni da‘vâ-yı mezkûremden fâriğa olmak üzere bin nakd-i râyic fi’l-vakt akçeye sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr bin akçeyi mezbûr Panayot yedinden bi’t-tamam ahz u kabz edip menzil-i mezbûr da‘vâsından mezbûr Panayot’dan minvâl-i muharrer üzere cârî ve sâdır olan ikrârını el-mukarru-leh merkūm Panayot bi’l-muvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Ahmed Efendi b. Muharrem Efendi el-kādî, Veli Çavuş b. Süleyman, Mustafa Çelebi b. Abdullah, Derviş b. Ali.