İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 828 Hüküm no: 1009 Orijinal metin no: [140a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Arakil v. Yani’nin ölen Serkiz zimmetinde kalan alacağının terekesinden ödenmesi Mahrûse-i Galata a‘mâlinden kasaba-i Kasım Paşa’da ekmekci tâifesinden işbu râfi‘u’s-sifr Arakil v. Yani nâm Ermeni meclis-i şer‘-i hatîr-i lâzımü’t-tevkīrde Karagöz v. Serkiz nâm şâbb-ı emred mahzarında üzerine da‘vâ ve takrîr-i kelâm edip mezbûr Karagöz’ün babası olup bundan akdem hâlik olan mezbûr Serkiz zimmetinde iki re’s bargir bahâlarından seksen esedî guruş hakkım olup kable’l-îfâ hâlik olmağla meblağ-ı mezbûr hâlik-i mezbûrun zimmetinde bâkī kalmışdır suâl olunup muhallefâtından alıverilmesi matlûbumdur dedikde gıbbe’s-suâl mezbûr Karagöz cevâbında fi’l-vâki‘ müdde‘î-i mezbûr Arakil’in babam hâlik-i mezbûr Serkiz zimmetinde iki re’s bargir bahâlarından seksen esedî guruş hakkı vardır muhallefâtından edâ ederim deyü mukırr u mu‘terif olmağın ikrârı mûcebince meblağ-ı mezbûr seksen esedî guruşu hâlik-i mezbûrun muhallefâtından müdde‘î- i mezbûr Arakil’e edâya mezbûr Karagöz’e tenbîh birle mâ-vaka‘a ketb olundu. Fi’l-yevmi’s-sâmin ve’l-işrîn min-Zilka‘deti’ş-şerîfe li-sene isneyn ve elf. Şuhûdü’l-hâl: Baba Resûl b. Rıdvan, Veli b. Mahmud, Mehmed b. Halil, Abdülkerim b. Halil.