İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 829 Hüküm no: 1011 Orijinal metin no: [140a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meygun Hanım’ın ölen kocasının cariye bedelinden Mehmed Efendi b. Hasan’a borcu olduğunu bilmediğine dair yemin ettiği Mahmiye-i İstanbul’da Hoca Kasım Gönânî mahallesinde sâkin Mehmed Efendi b. Hasan mahfil-i kazâda mahmiye-i mezbûrede Firuzağa mahallesinde sâkin iken bundan akdem fevt olan Hasan Çavuş’un zevce-i metrûkesi ve terekesine vâzı‘atü’l-yed olan Meygûn bt. Abdullah tarafından zikri âtî da‘vâya husûmet ve redd-i cevâba vekîl-i müsecceli olan Yusuf Beşe b. Abdullah mahzarında üzerine da‘vâ ve takrîr-i kelâm edip mezbûr Hasan Çavuş’a hayatında sekiz sene mukaddem Rusiyyetü’l-asl Mülâyim nâm câriye-i memlûkemi iki yüz riyâlî guruşa bey‘ ve teslîm ol dahi iştirâ ve kabûl ve kabz edip semenini bana teslîm etmeyip zimmetinde kalmağla hâlâ mezbûre Meygûn’un makbûzu olan tereke-i vâfiyesinden taleb ederim vekîl-i merkūmdan suâl olunsun dedikde gıbbe’s-suâl vekîl-i mezbûr cevâbında müvekkilesinin müteveffâ-yı mezbûrun terekesinden kendi hissesi mukābelesinde ancak altı bin akçe kabzını ikrâr ve vech-i muharrer üzere sâlifü’z-zikr câriye-i merkūme[yi] Hasan Çavuş’[un] hayatında iki yüz guruşa iştirâ ve kabz eylediği ma‘lûmu değildir deyü inkâr edicek müdde‘î-i mezbûrdan müdde‘âsına muvâfık beyyine taleb olundukda ityân-ı beyyineden izhâr-ı acz edip istihlâf etmeğin mezbûre Meygûn’un meclis-i şer‘a huzûru müte‘azzire olmağın tahlîf için kıbel-i şer‘den Mevlânâ Mehmed Efendi irsâl olunup ol dahi mahmiye-i mezbûrede Mimar Sinan mahallesinde mezbûre Meygûn’un sâkine olduğu menziline varıp zeyl-i vesîkada muharrerü’l-esâmî olan Müslimîn huzûrunda akd-i meclis-i şer‘ eyledikde mezbûrenin zâtı mahalle-i mezbûre sükkânından Mehmed Çelebi b. Ali ve Musa Halîfe b. Mustafa el-müezzin ta‘rîfleriyle mu‘arrefe oldukdan sonra fi’l-vâki‘ câriye-i mezkûreyi müteveffâ-yı mezbûr hayatında vech-i muharrer üzere iki yüz guruşa merkūm Mehmed Efendi’den iştirâ ve kabz edip ol cihetden deyni olduğunu bilmediğine mezbûr Mehmed Efendi huzûrunda mezkûre Meygûn’a yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mûcebince mezbûr Mehmed Efendi ta‘arruzdan men‘ birle mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Halil Bey b. Mahmud, Mehmed Efendi b. Yusuf, Yusuf Bey b. Abdullah, Mehmed Çelebi b. Ali, Musa b. Mustafa.