İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 833 Hüküm no: 1018 Orijinal metin no: [141a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Abdullah’ın aklını çelerek evinde alıkoyduğu küçük kız çocuğu Fâtıma bt. Mehmed’in annesi Hatice bt. Eyüb’e teslimi Mahmiye-i İstanbul’da Çukur mahallesinde sâkine Hadîce bt. Eyüb nâm hatun meclis-i şer‘-i hatîr-i lâzımü’t-tevkīrde Ümmühani bt. Abdullah nâm hatun tarafından husûs-ı âti’z-zikre vekîl olup bi-mâ hüve nehcü’s-sübût vekâleti şer‘an sâbite olan Âişe bt. Mehmed nâm hatun mahzarında üzerine da‘vâ ve takrîr-i kelâm edip işbu hazır bi’l-meclis olan Fâtıma bt. Mehmed nâm sagīreyi bundan [akdem] sagīre-i mezbûrenin babası mezkûr Mehmed terbiye için bi-tarîkı’t-tebennî bana teslîm edip ben dahi tesellüm etmiş idim vekîl-i mezbûrenin müvekkilesi mezbûre Ümmühani Hatun sagīre-i mezbûre Fâtıma’yı iznim yoğiken idlâl edip menzilinde iskân eder suâl olup alıverilmek matlûbumdur dedikde gıbbe’s-suâl mezbûr Âişe cevâbında sagīre-i mezbûre Fâtıma müvekkile-i mezbûre yedinde olduğunu ikrâr lâkin sagīre-i mezbûrenin babası mezkûr Mehmed müdde‘iye-i mezbûreye benim için teslîmi inkâr etmeğin müdde‘iye-i mezbûreden müdde‘âsını mübeyyine beyyine taleb olundukda mahrûse-i Galata’ya tâbi‘ kasaba-i Kasım Paşa mahallâtından Piyale Paşa mahallesinde sâkin Mehmed b. Şaban ve Mustafa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu hazır bi’l-meclis olan sagīre-i mezbûre Fâtıma’yı babası mezbûr Mehmed müdde‘iye-i mezbûre Hadîce Hatun’a terbiye için [bi]-tarîkı’t-tebennî bizim huzûrumuzda teslîm edip ol dahi tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde sagīre-i mezbûre Fâtıma’yı müdde‘iye-i mezbûre Hadice’ye teslîme müvekkile-i mezbûre Ümmühani’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe li-sene isneyn ve seb‘în ve elf. Şuhûdü’l-hâl: Receb Efendi b. Hüsam el-müezzin, Şükrullah b. Mustafa, Abdi Çelebi b. Hüseyin, Resûl b. Rıdvan, Mehmed b. Ramazan.