|
İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 834 Hüküm no: 1019 Orijinal metin no: [141a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hatice bt. Rıdvan’a ait herhangi bir eşya almadığına dair kocası Ahmed b. Mustafa’nın yemin ettiği
Mahmiye-i İstanbul’da Çırakcı Hasan Paşa mahallesinde sâkine Hadîce bt. Rıdvan nâm hatun tarafından eşyâ-i câ’i’z-zikri da‘vâya vekîl olup vekâleti mezbûre Hadice’nin zâtını ma‘rifet-i şer‘iye ile ârifân el-Hâc Bayram b. Receb ve Mehmed b. Salih nâm kimesneler şehâdetleriyle sâbite olan Mehmed Efendi b. Mehmed meclis-i şer‘-i hatîrde mezbûre Hadice’nin zevci bâ‘isü’l-vesîka Ahmed b. Mustafa mahzarında üzerine bi’l-vekâle da‘vâ ve takrîr-i kelâm edip târih-i kitâbdan altı ay mukaddem mezbûr Ahmed müvekkilem mezbûrenin mülkünde olan eşyâsından ikişer yüz akçe kıymetli üç münakkaş boğçası ile yüz akçe kıymetli otuz aded münakkaş yağlıklarını ve beş guruş kıymetli bir sadefkârî âyinesini ve ikişer yüz akçe kıymetli on üç kıt‘a ketân bezi gömleklerin menzilinden gasb ve kabz etmiş idi hâlâ eşyâ-i mezkûrenin aynı mevcûd ise aynını ve illâ ba‘de’l-isbât kıymetlerini bi’l-vekâle mezbûr Ahmed’den taleb ederim suâl olunsun dedikde gıbbe’s-suâl ve’l-inkâr vekîl-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Ahmed eşyâ-i mezkûreyi müvekkile-i mezbûrenin menzilinden gasb ve kabz eylemediğine yemîn teklîf olundukda ol dahi alâ-vefki’l-mesûl yemîn billâhi’l-aliyyü’l-azîm etmeğin vekîl-i mezbûr Ahmed Efendi bilâ-beyyine mu‘ârazadan men‘ birle mâ-vaka‘a bi’t-taleb ketb olundu.
Fi’l-yevmi’s-sânî ve’l-işrîn min-Zilhicceti’ş-şerîfe li-sene isneyn ve seb‘în ve elf.
Şuhûdü’l-hâl: Veli b. Mehmed, Mustafa Çelebi b. İsa, Hüseyin Bey b. Abdullah, İsmail Çelebi b. Mehmed, el-Hâc Ömer, Şükrullah b. Mustafa.
|