İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 834 Hüküm no: 1020 Orijinal metin no: [141b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Timurhan bt. Abdullah’ın muhâlaa yoluyla kocası Mustafa b. Hasan’dan boşandığı Mahmiye-i İstanbul’da Topkapısı dâhilinde Fâtıma Sultan mahallesinde sâkine Timurhan bt. Abdullah tarafından vech-i âtî üzere hul‘ ve ibrâya vekîl olup mezbûrenin zâtını ma‘rifet-i şer‘iye ile ârifân olan el-Hâc Şaban b. Hasan ve el-Hâc Hüseyin b. Şaban şehâdetleriyle şer‘an vekâleti sâbite olan Osman b. Mustafa meclis-i şer‘-i hatîrde müvekkile-i mezbûrenin zevci işbu rafi‘u’l-kitâb Mustafa b. Hasan mahzarında bi’l-vekâle ikrâr edip müvekkilemin zevci mezbûr Mustafa ile vekâletim hasebiyle bin akçe mehri ve me’ûnet-i süknâsı üzerlerine muhâla‘a-i sahîha-i şer‘iye ile muhâla‘a eylediğimde ol dahi hul‘-ı mezbûru kabûl edip ve nafaka-i iddeti için yedinden üç yüz seksen akçe aldığımdan sonra zevciyete müte‘allika cemi de‘âvîden asâleten ve vekâleten her birimiz âharın zimmetine ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc İbrahim Efendi b. Ahmed Efendi, Ömer Çelebi b. İbrahim, Mehmed b. Ramazan, Osman b. Abdullah, Resûl b. Rıdvan.