İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 836 Hüküm no: 1022 Orijinal metin no: [141b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferhad Ağa Vakfı’na ait yanan mescid ile yeni iki odanın inşası için vakıf malından mütevellinin 41.519 akçe harcadığının tespit edildiği Mahmiye-i İstanbul’da Çinilihamam kurbünde vâki‘ merhûm Ferhad Ağa Vakfı’na hâlâ mütevellî olan zahru’l-emsâl Mahmud Çavuş b. Ali meclis-i şer‘de takrîr-i kelâm edip merhûm-ı mezbûrun zikrolunan Çinilihamam kurbünde vâki‘ mescid-i şerîfi bin [yetmiş] senesinde vâki‘ harîk-i ekberde muhterik olup müceddeden binâ olunmak için sâbıkā yeniçeriler kethudâsı olan Süleyman Ağa otuz üç bin akçe imdâd edip mâ‘adâsı mal-ı vakıfla tecdîd ve mescid-i mezbûrun mü’ezzinine meşrûta olup yine mescid-i mezbûrun hareminde iki bâb tahtânî odalarını dahi tecdîd etmişdir savb-ı şer‘den üzerlerine varılıp masrûfum olan meblağın mertebe-i tahammülü tahmîn-i sahîh ile tahmîn ve takdîm olunmak murâdımdır dedikde kıbel-i şer‘den Mevlânâ Mehmed Efendi b. Mahmud irsâl olunup ol dahi hâssa mi‘mârlardan Üstâd el-Hâc Hasan b. Ömer ile zikrolunan mescid-i mezbûrun üzerine varılıp ba‘de’l-keşf ve’n-nazar mi‘mâr-ı mezbûr mesâha ve takvîm eyledikde tûlen yedi buçuk ve kadden altı be-hesâb-ı şatrancî kırk beş buçuk zirâ‘ kireç sıvalı taş duvarın her zirâ‘ı altmışar akçedir iki bin yedi yüz otuz akçe ve tûlen yedi kadden altı be-hesâb-ı mezbûr kırk iki zirâ‘ dolma duvarın her zirâ‘ı ellişer akçeden iki bin yüz akçe tûlen on beş buçuk arzan on dört be-hesâb-ı mezbûr iki yüz on yedi buçuk zirâ‘ sakfın her zirâ‘ı altmışar akçeden [142a] on üç bin elli akçe ve üç aded billûr cam ikişer yüz kırkar akçeden yedi yüz yirmi akçe ve üç aded sırça cam yüz ellişer akçeden dört yüz elli akçe tûlen dokuz arsan dokuz be-hesâb-ı mezbûr seksen bir zirâ‘ tavanın her zirâ‘ı kırkar akçeden üç bin iki yüz kırk akçe defa tûlen beş ve arzan beş be-hesâb-ı şatrancî yirmi beş zirâ‘ sıvanın her zirâ‘ı kırkar akçeden bin akçe ve üç demir pencerenin her biri altışar yüz akçeden bin sekiz yüz akçe ve iki sade kapı yüz ellişer akçeden üç yüz akçe ve bir mahfil döşemesiyle ve nerdübânıyla ve trabzanı ile bin beş yüz akçe ve bir kemer mescid kapısı bin akçe ve tûlen dokuz buçuk ve arzan altı buçuk be-hesâb-ı şatrancî altmış ike zirâ‘ defa tavanın her zirâ‘ kırkar akçeden iki bin dört yüz seksen akçe tûlen on iki kadden iki be-hesâb-ı mezbûr yirmi dört zirâ‘ tavra tavanın her zirâ‘ı kırkar akçeden dokuz yüz altmış akçe tûlen on iki arzan on be-hesâb-ı mezbûr yüz otuz iki zirâ‘ sakfın her zirâ‘ı altmışar akçeden yedi bin dokuz yüz yirmi akçe ve altmış beş aded parmaklık vergenin her biri on beşer akçeden dokuz yüz yetmiş beş akçe ve tûlen altı kadden beş be-hesâb-ı şatrancî otuz zirâ‘ taş duvarın her zirâ‘ı altmışar akçeden bin sekiz yüz akçe tûlen dokuz buçuk arzan altı be-hesâb-ı mezbûr altmış iki zirâ‘ tahta döşemenin her zirâ‘ı ellişer akçeden üç bin yüz akçe tûlen yedi ve kadden altı be-hesâb-ı mezbûr kırk iki zirâ‘ tahta minâre perdesinin her zirâ‘ı altmışar akçeden iki [bin] beş yüz yirmi akçe ve bir minâre alemi yedi yüz elli beş akçe ve minârenin külâh vereni ve kurşun üsâdiyyesi bin beş yüz akçe ve beş aded İznikmid direği yüz yirmişer akçeden altı yüz akçe ve tûlen dört kadden üç be-hesâb-ı şatrancî on iki zirâ‘ taş duvarın her zirâ‘ı altmışar akçeden yedi yüz yirmi akçe ve sekiz ayak taş nerdübânın her biri ikişer yüz akçeden bin altı yüz akçe ve bir cedîd mihrâb ber-vech-i maktû‘ bin akçe ve tûlen dört kadden üç be-hesâb-ı mezbûr on iki zara taş duvarın her zirâ‘ı ellişer akçeden altı yüz akçe tûlen ve kadden altı zirâ‘ dolma duvarların her zirâ‘ı kırkar akçeden iki yüz kırk akçe ve bir mahalle kapısı üzerinin sakfı ile ber-vech-i maktû‘ ben beş yüz akçe ve ücret-i lağımcıyân berây-ı hedm kubbe-i atîk bin akçe ve tûlen on sekiz kadden üç be-hesâb-ı şatrancî elli dört zirâ‘ mü’ezzin hânesinin dolma duvarı her zirâ‘ı ellişer akçeden iki bin yedi yüz akçe, tûlen on ve kadden dokuz be-hesâb-ı mezbûr hâne-i mezbûrun doksan zirâ‘ sakfının her zirâ‘ ellişer akçeden dört bin beş yüz akçe ve iki ocak beşer yüz akçeden bin akçe ve iki sade kapı ellişer akçeden üç yüz akçe ve iki pencere yüz ellişer akçeden üç yüz akçe ve iki musandıra üç yüz akçeden altı yüz akçe tûlen altı arzan dört be-hesâb-ı şatrancî yirmi dört zirâ‘ tahta döşemenin zirâ‘ı kırkar akçeden dokuz yüz altmış akçe tahliye-i zemin mescid için ücret-i ırgādiye iki bin beş yüz akçe ve tahliye-i mezbûr için ücret-i mezbele-keşân üç bin dört yüz yirmi akçe ki cem‘an yetmiş dört bin beş yüz on dokuz akçe ile ancak binâ mümkündür bundan ekall ile mümkün değildir deyü mi‘mâr-ı mezbûr ve sâir bî-garaz-ı Müslimîn icmâ‘ ve ittifâk eylediklerinden sonra mezkûr Süleyman Ağa’nın hesâb eylediği otuz üç bin akçeden ziyâde mal-ı vakıfdan mütevellî-i mezbûrun masrûfu kırk bir bin beş yüz on dokuz akçe olduğu zâhir olmağın vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa b. Ali ve İsmail b. Murad ile meclis-i şer‘a gelip alâ-vukū‘ihî inhâ ve takrîr etmeğin ma vaka‘a bi’t-taleb ketb olundu. Fi’l-yevmi’s-sâlis aşer min-Zilhicceti’ş-şerîfe li-sene isneteyn ve seb‘în ve efl. Şuhûdü’l-hâl: Mustafa Çelebi b. Mehmed, Bâyezid b. Yunus, Hasan Çelebi b. Ahmed, el-Hâc Ahmed b. Bahaeddin, Ali Çelebi b. Mehmed, Osman b. Abdi, Yusuf b. Abdullah ve gayruhum.