İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 837 Hüküm no: 1023 Orijinal metin no: [142a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maden b. İbrahim’in tasarrufundaki vakıf arsa üzerine kendi mülkü olmak üzere bina yapmasına izin verildiği Mahmiye-i İstanbul’da Kâtib Şemseddin mahallesinde vâki‘ merhûme Âişe Hatun Vakfı’na hasbî mütevellî olan fahrü’l-akrân Veli Çelebi b. el-Hâc Mahmud mahfil-i kazâda zikri âtî muhterik menzil arsasına mutasarrıf olan Maden b. İbrahim nâm kimesne mahzarında bi’t-tevliye ikrâr ve takrîr-i kelâm edip mahalle-i mezbûrede bir tarafı el-Hâc Hasan mülkü ve bir tarafı Ömer Bey tasarrufunda olan vakıf menzil ve iki tarafı tarîk-i âmma müntehî fevkānî ve tahtânî büyût-ı müte‘addideyi müştemil olup arsasının senede merhûm Rum Mehmed Paşa Vakfı’na on bir akçe mukāta‘a-i kadîmesi ve ebniyesinin dahi icâre-i mu‘accele ve her şehr merkūme Âişe Hatun Vakfı’na altmış akçe ücret-i mü’eccelesi ile merkūm Maden’in taht-ı tasarrufunda iken yetmiş senesi Zilka‘desi’nin on altıncı gününde menzil-i mezbûr muhterik olup mersûme Âişe Hatun’un vakfı olan ebniyeden beş bin beş yüz akçeye mukaddem yüz on beş zirâ‘ taş duvar kalmış idi hâlâ tevliyetim hasebiyle zikrolunan muhterik menzil arsasını merkūmdan üç bin akçe icâre-i mu‘accele ve her şehr yirmi beş akçe ücret-i mü’eccele îcâr ol dahi vech-i muharrer üzere istîcâr ve kabûl eyledikden sonra ba‘de’l-yevm zikrolunan arsa üzerine ihdâs edeceği ebniye kendi mülkü olmak üzere mezbûr Maden’e binâya izin verdim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed b. Mustafa Efendi, Ahmed Ağa b. Davud, Hüseyin Efendi b. Abdülvehhab, Halil Bey b. Abdullah, Hüseyin Çelebi. Hacı Ahmed.