.:: İstanbul Kadı Sicilleri ::.


İstanbul Mahkemesi 10 Numaralı Sicil (H. 1072-1073 / M. 1661-1663)
cilt: 51, sayfa: 838
Hüküm no: 1024
Orijinal metin no: [142a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Şerife Rabia bt. Seyyid Mustafa Efendi’nin bahçesinden kiracısı Mustafa b. Abdullah’ın kira süresi bitmeden çıkarılmaması

Mahmiye-i İstanbul’da Avratpazarı kurbünde sâkine fahrü’l-muhadderât Şerife Râbia Hatun bt. el-merhûm es-Seyyid Mustafa Efendi’nin mahmiye-i mezbûrede Silivrikapısı hâricinde vâki‘ mülk bahçesinde müste’ciri olan bâ‘isü’l-vesîka Mustafa b. Abdullah mahfil-i kazâda müşârün-ileyhâ Şerife Râbia’nın husûs-ı câ’i’z-zikre vekîl-i sâbitü’l-vekâlesi Hüseyin Bey b. Kasım mahzarında takrîr-i kelâm ve bast-ı merâm edip mezbûr Hüseyin Bey vekâleten zikrolunan bahçeyi bin yetmiş iki Şevval’i gurresinden bir sene tamamına değin üç bin iki yüz akçe ücret ile îcâr ol dahi minvâl-i muharrer üzere istîcâr ve kabûl edip ücret-i mersûmeden ber-vech-i peşîn vekîl-i mezbûr Hüseyin Bey’e bin iki yüz altmış akçe ve Paydar bt. Abdullah nâm hatun yediyle müvekkile-i müşârün-ileyhâya dahi üç yüz kırk akçe ki cem‘an bin altı yüz akçe def‘ ü teslîm eyledikden sonra [142b] müşârün-ileyhâ Şerife Râbia Hatun yedime mühürlü tezkire vermiş iken hâlâ müddet-i icârem tamam olmadın mezbûr Hüseyin Bey bahçeden çık deyü bi-gayr-ı vech-i şer‘î ta‘arruz ve rencîdeden hâlî değildir suâl olunup men‘ olunmasını taleb ederim dedikde gıbbe’s-suâl vekîl-i mezbûr Hüseyin Bey cevâbında kazıyye minvâl-i muharrer üzere olduğunu ikrâr edecek müddet-i icâre tamamına değin bî-vech ta‘arruzdan men‘ olunup mâ-vaka‘a bi’t-taleb ketb olundu.

Fi’l-yevmi’l-işrîn min-Zilhicceti’ş-şerîfe li-sene isneteyn ve seb‘în ve elf.

Şuhûdü’l-hâl: Abdi Çelebi b. Hüseyin, Resûl b. Rıdvan, Veli b. Mahmud, Ahmed b. Abdülcabbar, Mehmed b. Ramazan ve gayruhum.