İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 839 Hüküm no: 1025 Orijinal metin no: [142b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maden b. İbrahim’in tasarrufunda iken yanan vakıf menzilin yeri keşfolundukda kalan taş duvar ve enkazın 5.575 akçe değerinde olduğunun anlaşıldığı Mahmiye-i İstanbul’da Kâtib Şemseddin mahallesinde vâki‘ merkūme Âişe Hatun nâm sahibetü’l-hayrın vakf eylediği menzil-i âti’l-beyânın hasbî mütevellîsi olan işbu bâ‘isü’l-kitâb Ali Çelebi b. el-Hâc Mahmud meclis-i şer‘-i hatîr-i lâzımü’t-tevkīrde takrîr-i kelâm edip mahalle-i mezbûrede vâki‘ bir tarafı el-Hâc Hasan mülkü ve bir tarafı Ömer Bey tasarrufunda olan vakıf menzil ve iki tarafı tarîk-i âmma müntehî fevkānî ve tahtânî büyût-ı müte‘addideyi müştemil olup arsasının senede merhûm dedem Mehmed Paşa Vakfı’na on bir akçe mukāta‘a-i kadîme ve ebniyesinin dahi icâre-i mu‘accele ve beher sene merkūme Âişe Hatun Vakfı’na altmış akçe ücret-i mü’eccelesi olan menzil gāib ani’l-meclis Maden b. İbrahim nâm kimesnenin taht-ı tasarrufunda iken bin yetmiş senesi Zilka‘desi’nin on altıncı gününde muhterik olmağın mezbûre Âişe Hatun’un vakfından olan enkāzı mezbûr Maden mülkü olmak üzere vaz-ı yed eder. Hâlâ cânib-i şer‘den üzerine varılıp mezbûr Maden muvâcehesinde ba‘de’l-keşf ve’l-mesâha mahalle-i mezbûre ahâlîsinden olup bî-garaz Müslimînden hakīkat-i hâl suâl olunup takrîrleri tahrîr olunmak bi’t-tevliye matlûbumdur dedikde savb-ı şer‘den Mevlânâ Keşfî Mustafa Efendi irsâl olunup ol dahi hâssa mi‘mârlardan Üstâd el-Hâc Hasan b. Ömer ve Üstâd Ali b. Abdullah ve zeyl-i vesîkada muharrerü’l-esâmî olan bî-garaz Müslimîn ile zikrolunan muhterik menzil-i mezbûr arsasının üzerine varıp mi‘mârân-ı mezbûran merkūm Maden muvâcehesinde merkūme Âişe Hatun’un vakfı olan duvar ile nıkzı mesâha ve takvîm eylediklerinde tûlen ve arzan be-hesâb-ı şatrancî yüz on beş zirâ‘ taş duvarın her zirâ‘ kırk beşer akçeden beş bin beş yüz yetmiş akçeye takvîm eylediklerinden sonra ahâlî-i mahalle-i mezbûreden olup Nallı Mustafa Efendi b. Mehmed ve Ahmed Ağa b. Davud ve Hüseyin Efendi b. Abdülvehhab ve Halil Bey b. Abdullah ve Sabri Çelebi b. el-Hâc Mehmed ve Ahmed Efendi b. Mustafa ve Himmet Beşe b. Ahmed ve Mustafa Beşe b. Hüseyin nâm kimesnelerden suâl olundukda onlar dahi fi’l-hakīka işbu mi‘mârân-ı mezbûrân mesâha eyledikleri beş bin beş yüz yetmiş beş akçeye takvîm ve be-hesâb-ı şatrancî yüz on beş zirâ‘ taş duvar merkūme Âişe Hatun’un vakf eylediği ebniyedendir deyü her biri alâ-tarîkı’ş-şehâde haber verdiklerini mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Efendi b. Mustafa, Hüseyin Bey b. Mehmed, Hasan Çelebi b. Ahmed, Muslı Beşe b. İbrahim, Kâtibü’l-hurûf Keşfî Mustafa Efendi.