İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 840 Hüküm no: 1026 Orijinal metin no: [142b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum İbrahim b. Ali’nin kız kardeşiyle birlikte tasarruf ettiği mülk menzildeki hissesinin varisleri tarafından Mehmed b. Derviş’e satıldığı ve vakıf arsasının da mütevelli izniyle devredildiği Mahmiye-i İstanbul’da Ali Paşa-yı Atîk mahallesinde sâkin iken bundan akdem vefât eden İbrahim b. Ali nâm kimesnenin verâseti vâlidesi Canfeda bt. Abdullah ve li-ebeveyn kız karındaşı Râbia’ya ve li-üm er karındaşı Ali’ye ve li-eb karındaşı Mehmed’in oğulları Mustafa ve İsmail’e münhasıra olduğu ve tashîh-i mes’eleleri on iki sehimden olup sihâm-ı mezbûreden iki sehmi mezbûre Canfeda’ya ve altı sehmi mezbûr Râbia’ya ve iki sehmi mezbûr Ali’ye ve birer sehmi mezbûrân Mustafa ve İsmail’e intikāl ve isâbet eylediği şer‘an zâhir oldukdan sonra mezbûrûn Ali ve Mustafa ve İsmail ve mezbûre Canfeda asâleten ve mezbûre Râbia tarafından husûs-ı câ’i’z-zikri ikrâra vekîl olup mezbûrenin zâtını ma‘rifet-i şeriyye ile ârifân olan İbrahim b. Hasan şehâdetleriyle şer‘an vekâleti sâbite olan Ahmed Efendi b. el-Hâc Yusafa nâm kimesne vekâleten meclis-i şer‘-i hatîrde işbu râfi‘u’l-kitâb Mehmed b. Derviş nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan es-Seyyid Hacı Mahmud mülküne ve bir tarafdan el-Hâc İsa tasarrufunda olan vakıf menziline ve iki tarafdan tarîk-i âmma müntehî iki bâb tahtânî beyti ve iki sofayı hâvî olup arsasının Sekbân Ali Vakfı’na senede elli akçe mukāta‘a-i kadîmesi olup binâsı li’z-zekeri mislü hazzi’l-ünseyeyn müteveffâ-yı mezbûr İbrahim ile li-ebeveyn kız karındaşı mezbûre Râbia’nın babaları mezbûr Ali’den müntakil mülk-i mevrûsları olup ile’l-vefât müşâ‘iyet üzere mutasarrıflar idi el-hâletü hâzihî mecmû‘-ı arsa ve menzil-i mezbûru izn-i mütevellî ile meccânen mezbûr Mehmed’e ferâğ ve tefvîz ve ebniye-i memlûke-i mezbûrenin mecmû‘unu dahi merkūm Mehmed’e on dört bin akçeye bâtten bey‘ ve teslîm ve mezbûr Mehmed dahi minvâl-i muharrer iştirâ ve tesellüm ve kabûl eyledikden sonra semeni olan meblağ-ı mezbûru on dört bin akçeden her birimiz hissemizi bi’t-tamam ve’l-kemâl müşteri-i mezbûr Mehmed yedinden alıp kabz eyledik ba‘de’l-yevm menzil-i mahdûd-ı mezbûrun arsası hakk-ı müfevvaz ve binâsı mülk-i müşterâsıdır keyfe mâ yeşâ’ ve yahtâr mutasarrıf olsun dedikde mukırrûn-ı mezbûrûn bi’l-asâle ve bi’l-vekâle cârî ve sâdır olan ikrâr-ı meşrûhlarında müşteri-i mezbûr Mehmed’i bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene isneteyn ve seb‘în ve elf. [143a] Şuhûdü’l-hâl: Abdullah el-imâm, İbrahim Çelebi b. Hasan, Hacı Mustafa b. Hasan, Hasan Efendi b. ( ) el-imâm, Mustafa b. Ali, Pîrî b. Hüseyin, Mehmed b. Ramazan, Veli b. Mahmud, Abdünnebi Çelebi b. Hüseyin.