İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 841 Hüküm no: 1027 Orijinal metin no: [143a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soruşturulmaları için ferman çıkarılan Mehmed’in kızları Sâliha ve Âmine’nin iyi hallerine şahitlik edildiği Dârü’s-saltanati’s-seniyye Kostantıniyyeti’l-mahmiye’de bi’l-fi‘il za‘îmü’l-vakt olan fahrü’l-akrân Mehmed Ağa b. Ahmed meclis-i şer‘-i şerîfe gelip takrîr-i kelâm edip mahmiye-i mezbûrede Hoca Hayreddin mahallesi sâkinelerinden Sâliha ve Âmine ibnetey Mehmed nâm hatunların mahalleleri ahâlîsinden teftîş ve tefahhusları bâbında fermân-ı âlî sâdır olmuşdur kıbel-i şer‘-i mutahhardan mahallelerine varılıp teftîş ve tefahhus olunmak matlûbumdur dedikde sicn-i sultanîde nâibü’ş-şer‘ olan Mevlânâ Abdurrahman Efendi irsâl olunup ol dahi zeyl-i kitâbda mastûrü’l-esâmî olan Müslimîn ile mahalle-i mezbûreye varıp akd-i meclis-i şer‘-i şerîf eyledikde meclis-i ma‘kūd-ı mezbûrda mahalle-i mezkûre sükkânından mezbûretânın keyfiyet-i ahvâlleri suâl ve tefahhus olundukda mahalle-i mezbûrede sâkin Mehmed Efendi b. İbrahim ve Mehmed Halîfe b. Bayram el-müezzin ve Abdullah b. İlyas ve Mehmed b. Bali ve Ramazan b. Veli ve İbrahim Beşe b. Hasan ve sâir cemm-i gafîr kimesneler meclis-i ma‘kūd-ı mezbûrda mezbûretân Sâliha ve Âmine’nin bu ana değin sû’-i hâllerine muttali‘ olmadık her vechile sâlihalar ve mütedeyyine hatunlardır deyü hüsn-i hâllerini alâ-tarîkı’ş-şehâde haber verdiklerinde vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-akrân Osman Ağa, Salih b. Ahmed, İbrahim b. Yusuf, Mustafa b. Ali, İvaz b. Yusuf, Mustafa Beşe, Nasuh b. İvaz, Mustafa b. Ahmed.