İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 842 Hüküm no: 1029 Orijinal metin no: [143a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli Bey tarafından geliri İlmî Bey mahallesi avarızına vakfedilen yanmış menzil arsasının kullanım hakkının Mustafa b. Yusuf’a devredildiği Mahmiye-i İstanbul’da İlmî Bey mahallesinde Veli Bey nâm sahibü’l-hayrın mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzilini vakf ve süknâ ve tevliyeti beher sene mahalle-i mezbûre avârızına beşer yüz akçe vermek üzere evlâdına ve evlâd-ı evlâdına şart ve ta‘yîn etmeğin menzil-i mezbûra evlâddan meşrûtiyyet üzere mutasarrıf olan İbrahim b. İbrahim nâm kimesne meclis-i şer‘-i hatîrde işbu bâ‘isü’l-kitâb Mustafa b. Yusuf mahzarında ikrâr ve takrîr-i kelâm edip menzil-i mezbûr bin yetmiş senesi Zilka‘desi’nin on altıncı gününde vâki‘ olan harîkde muhterik olup arsa-ı sırfa kaldıkda müceddeden binâya ve beher sene beş yüz akçe avârızı dahi vermeğe iktidârım olmayıp âhara tefvîz olunmak vakfa enfa‘ olmağın tevliyetim hasebiyle tûlen ve arzan be-hesâb-ı şatrancî dört yüz zirâ‘ arsa-i hâliyenin mahalle-i mezbûre avârızına senede beş yüz akçe vermek üzere hakk-ı tasarrufunu üç bin beş yüz akçe bedel mukābelesinde mezbûr Mustafa’ya ferâğ ve tefvîz ve teslîm edip ol dahi tefevvüz ve kabûl ve tesellüm eyledikden sonra bedel-i ferâğ olan meblağ-ı mezbûr üç bin beş yüz akçeyi mezbûr Mustafa’ya cihet-i deyn-i şer‘îden olan üç bin beş yüz akçe deynime takās edip ol dahi mukāssa ve kabûl eyledi ba‘de’l-yevm zikrolunan arsa mezbûr Mustafa’nın hakk-ı müfevvazidir keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn.