İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 847 Hüküm no: 1035 Orijinal metin no: [144b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsrail v. Mercan’ın Habbaz Mardiros v. Hayim’e on altı bin yedi yüz akçe borcu olduğunu ikrar ettiği Mahmiye-i İstanbul’da Ayazma Kapısı kurbünde vâki‘ fırında habbâz olan Mardiros v. Haim meclis-i şer‘de sâbıkā destgâhdârı İsrail v. Mercan muvâcehesinde üzerine takrîr-i da‘vâ edip mezbûr İsrail destgâhdârım ve şerîkim olup fesh-i akd-i şirket eylediğimizde ba‘de küllî hesâb asl-ı mal-ı şirketden mezbûr İsrail zimmetinde yirmi yedi bin akçe zuhûr etmekle meblağ-ı mezbûru hâlâ taleb ederim suâl olunsun dedikde gıbbe’s-suâl mezbûr İsrail cevâbında fi’l-vâki‘ ba‘de’l-küllî hesâb zimmetimde müdde‘î-i mezbûra asl-ı mal-ı şirketden yirmi yedi bin akçe zuhûr edip deynim idi. Lâkin meblağ-ı mezbûr on bin üç yüz akçesini sefîne reislerinden gāib ani’l-meclis Ahmed nâm kimesneye ver deyü müdde‘î-i mezbûr emretmekle ben dahi emrine binâen bi’t-tamam teslîm etmişimdir deyip on altı bin yedi yüz akçe zimmetinde olduğunu ikrâr mâ‘adâyı def‘le mukabele edecek gıbbe’l-istintâk ve’l-inkâr mezbûr İsrail[‘den] def‘-i mezbûrunu mübeyyine beyyine taleb olundukda ityân-ı beyyineden izhâr-ı acz ve istihlâf etmeğin fi’l-vâki‘ meblağ-ı mezbûr on bin üç yüz akçeyi mezbûr reise ver deyü emretmediğine müdde‘î-i mezbûra yemîn teklîf olundukda ol dahi yemînden nükûl etmeğin mûcebince on bin üç yüz akçe talebinden mezbûr Mardiros men‘ olundukdan sonra ikrârı mertebesi olan on altı bin yedi yüz akçeyi müdde‘î-i mezbûra teslîme merkūm İsrail’e tenbîh olunup mâ-vaka‘a bi’t-taleb kemt olundu. Hurrire fi’l-yevmi’l-hâdî ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin b. Ebûbekir, Resûl b. Rıdvan, Mehmed b. Ramazan, Abdi b. Hüseyin, el-Hâc Receb pazarbaşı, el-Hâc Mehmed b. Mahmud.