İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 847 Hüküm no: 1036 Orijinal metin no: [144b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Mustafa Ağa’nın belirli miktarda mehir akçesi üzerine Ali Beşe b. Mehmed ile evlendiği Nikâh. Mahrûse-i Galata muzâfâtından nefs-i İstinye’de sâkine Meryem bt. Mustafa Ağa nâm bikr-i bâliğa meclis-i şer‘-i hatîrde tüccâr-ı zevi’l-yesâr tâifesinden olup işbu kitâbın sahibi Ali Beşe b. Mehmed tarafından akd-i âti’z-zikre vekîl olup vekâleti fahrü’l-akrân Ahmed Ağa b. Mehmed ve Mustafa Çelebi b. Ali şehâdetleriyle hasm-ı câhid mahzarında şer‘an sâbite olan Mehmed Çelebi b. Süleyman nâm kimesne mahzarında tâyi‘aten ikrâr ve takrîr-i kelâm edip on bin akçe mehr-i mu‘accel ve yirmi bin akçe mehr-i mü’eccel üzerine nefsimi işbu meclisde hazır şuhûd mahzarında müvekkil-i mezbûr Ali Beşe’ye tezvîc eyledim dedikde vekîl-i mezbûr Mehmed Çelebi dahi mukırre-i mezbûre Meryem’i zikrolunan on bin akçe mehr-i mu‘accel ve yirmi bin akçe mehr-i mü’eccel üzerine meclis-i şerde müvekkil-i mezbûr Ali Beşe için bi’l-vekâle tezevvüc ve kabûl eyledim deyicek mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Umdetü’l-müderrisîni’l-İslâm Abdullah b. Hüseyin, Mehmed Ağa b. Mustafa, Mustafa b. İsa, Çukadâr Ramazan Beşe, Ahmed Beşe b. Yusuf.