İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 848 Hüküm no: 1037 Orijinal metin no: [144b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Abdülbaki’nin ziyade aldığı anlaşılan miras hissesini hak sahipleri Safiye ve Sâliha’ya iadesi Mahmiye-i İstanbul’da ( ) mahallesi sâkinelerinden olup bundan akdem vefât eden Fâtıma bt. es-Seyyid Ali nâm hatunun verâseti zî-rahm cihetinden li-eb kız karındaşı kızları Safiye ve Sâliha nâm hatunlar ile li-eb er karındaşı Abdülbaki’nin kızı Ümmühani nâm hatuna münhasıra ve asl-ı mes’eleleri dört sehimden i‘tibâr olunup sihâm-ı merkūmeden birer sehmi mezbûretân Safiye ve Sâliha’ya ve iki sehmi mezbûre Ümmühani’ye isâbet eylediği şer‘an zâhir oldukdan sonra mezbûretân Safiye ve Sâliha Hatun meclis-i şer‘de mezbûre Ümmühani mahzarında her biri üzerine da‘vâ ve takrîr-i kelâm edip bundan akdem mûrisemiz merkūme Fâtıma Hatun fevt oldukda muhallefâtından yirmi sekiz bin akçe beynimizde taksîm eylediğimizde üç sehimde kısmet edip meblağ-ı mezbûrun on sekiz bin akçesini mezbûre Ümmühani ve dokuz bin akçesini beraber alıp ba‘de ber-minvâl-i muharrer üç sehimden olan hata olup kısmet dört olduğuna hâlâ şeyhülislâm ve müfti-i kâffetü’l-enâm hazretlerinden yedimizde fetvâ-yı şerîfe olup zikrolunan fetvâ-yı şerîfe mûcebince mezbûre Ümmühani Hatun’un ahz u kabz eylediği on sekiz bin akçenin beş bin akçesi bizlere isâbet etmekle mezbûre Ümmühani Hatun’dan taleb ederiz suâl olunsun dedikde gıbbe’s-suâl mezbûre Ümmühani Hatun cevâbında fi’l-vâki‘ müteveffât-ı merkūmenin muhallefâtının nısfı mezbûretâna intikāl eylediği yedimizde olan fetvâ-yı şerîfede sâbit olmuşdur lâkin müteveffât-ı merkūmenin muhallefâtın yirmi yedi bin akçe olup üç sehimden iki sehmi bana isâbet eder zu‘muyla on yedi bin akçesini ben kabz eyledim deyüp meblağ-ı mezbûrdan on yedi bin akçe kabz eylediğini ikrâr meblağ-ı ziyâde bin akçeyi kabzını inkâr eyledikde müdde‘iyyetân-ı mezbûretândan ziyâde için beyyine taleb olundukda ityân-ı beyyine için istimhâl eyledikde mehl-i şer‘î ile imhâl olundukdan sonra ikrârı mûcebince kabz eylediği dört bin beş yüz akçeyi mezbûretân Safiye ve Sâliha Hatun’a red ve teslîme mezbûre Ümmühani Hatun’a tenbîh olundu. Mâ vaka‘a bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin Efendi el-Burûsî, Ahmed Çelebi b. Mahmud kethudâ-yı muhzırân, Şükrullah Bey b. Mustafa el-muhzır, Baba Resûl b. Rıdvan el-muhzır, Çukadâr Rıdvan Beşe, Abdi Çelebi b. Hüseyin el-muhzır.