İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 849 Hüküm no: 1038 Orijinal metin no: [145a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlmî Mustafa Efendi b. İbrahim Efendi’nin bazı emlakı ile bir atını Derviş Mehmed Bey’e satıp bir tarlasınının da kullanım hakkını devrettiği Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Monla Hüsrev mahallesinde vâki‘ Bostancıbaşı Sarayı’na varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde Vilâyet-i Anadolu’da İznik kasabasında Sermahfil mahallesinde sâkin umdetü’l-müderrisîni’l-kirâm İlmî el-Hâc Mustafa Efendi b. İbrahim Efendi tarafından husûs-ı âti’z-zikri ikrâra vekîl olup İbrahim Çelebi b. Süleyman ve Ali Bey b. Mustafa şehâdetleri ile şer‘an vekâleti sâbite olan Pîrî b. Hasan Efendi meclis-i mezbûrde işbu kitâbın sahibi fahrü’l-emâcid ve’l-akrân Derviş Mehmed Bey b. Süleyman mahzarında bi’l-vekâle ikrâr ve takrîr-i kelâm edip akd-i âtî sudûruna değin babası ve müvekkilimin silk-i mülkünde ve taht-ı tasarrufunda olup kasaba-i mezbûrede imâret karşısında vâki‘ bir tarafdan Tekezâde hamamı ile Solak kârhânesine ve bir tarafdan Akbaba Mektebi’ne ve iki tarafdan tarîk-i âmma müntehî ve mahdûd bir bâb arpacı dükkânını ve bir çini kârhâne arsasıyla bir bâb çini kârhânesini müştemil mülkümü mûmâ-ileyh Derviş Mehmed Bey’e otuz sekiz bin sekiz yüz seksen bir akçeye ve bir re’s al aygır atını dahi mûmâ-ileyhe otuz bin akçeye ve yine kasaba-i mezbûre kazasına tâbi‘ Moraga nâm karyede Hasbeyli sınırında vâki‘ lede’l-ahâlî ve’l-cîrân ma‘lûmü’l-hudûd bir harâbe oda arsası ile eşcâr-ı müsmire-i mütenevvi‘ayı hâvî mülk zeytin bahçesini mûmâ-ileyhe yetmiş bin akçeye ki cem‘an emlâk-i mezbûre ile at-ı mezbûru bi’s-safakat yüz otuz sekiz bin seksen bir akçeye bâtten bey‘ ol dahi minvâl-i muharrer üzere iştirâ ve kabûl eyledikden sonra yine karye-i mezbûre Moraga’da zikrolunan Hasbeyli sınırında Kaldırımaltı nâm mahâlde vâki‘ babam ve müvekkilimin taht-ı tasarrufunda olup tahmînen altmış dönüm bir kıt‘a tarlasının hakk-ı tasarrufunu sahib-i arz ma‘rifetiyle mezbûr Derviş Mehmed Bey’e otuz üç bin akçeye ferâğ ve tefvîz ol dahi minvâl-i muharrer üzere tefevvüz ve kabûl edip cem‘ân semen-i mezkûr yüz otuz sekiz bin sekiz yüz seksen bir akçe ile bedel-i tefvîz olan otuz üç bin akçeyi bi’t-tamam ve’l-kemâl babam mezbûr el-Hâc Mustafa Efendi merkūm Derviş Mehmed yedinden alıp kabz edip emlâk-i mezbûre ile tarla-yı mezkûru mahallerinden kabz ve tasarrufa mezbûr Derviş Mehmed Bey’i taslît eyledim ba‘de’l-yevm emlâk-i mezbûre ve bir re’s at ve tarla-yı merkūmda alâka ve medhali kalmadı dedikde gıbbe’t-tasdîkı’ş-şer‘î mevlânâ-yı mezbûr vâki‘ hâli mahâllinde tahrîr ba‘dehû ma‘an irsâl olunan Ali Bey b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-işrîn min-Zilhicceti’ş-şerîfe li-sene 1072 Şuhûdü’l-hâl: es-Seyyid Lütfullah Efendi b. Nurullah el-imâm-ı Yusuf Paşa, Mustafa Efendi el-müezzin-i Yusuf Paşa, el-Hâc Şaban Efendi b. Hasan, Mehmed Beşe b. Mumcu Ahmed, Abdullah Efendi, Kethudâ Pîrî Mehmed, Mehmed Ağa b. Mustafa.