İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 851 Hüküm no: 1040 Orijinal metin no: [145b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Handan bt. Abdullah’ın menzilinin yarım hissesini azatlı cariyesi Mükâfât bt. Abdullah’a sattığı Husûs-ı âti’l-beyânın mahâllinde tahrîri iltimâs olunmağın kıbel-i şer‘-i enverden Mevlânâ Mehmed Efendi irsâl olunup ol dahi mahmiye-i İstanbul’da Haraçcı Muhyiddin mahallesinde Handan bt. Abdullah nâm hatunun sâkin olduğu menziline varıp zeyl-i rakīmde isimleri mastûr Müslimîn huzûrunda akd-i meclis-i şer‘ eyledikde mezbûre Handan Hatun’un zâtı Şaban Çelebi b. Mehmed ve Hasan Çelebi b. Sefer ta‘rîfleriyle mu‘arrefe oldukdan sonra meclis-i ma‘kūd-i mezbûrda mu‘takası işbu bâ‘isü’l-vesîka Mükâfât bt. Abdullah mahzarında bi-tav‘ihâ ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı ba‘zan Çukur Hamamı külhanına ve ba‘zan Benunîzâde hatunu mülküne ve bir tarafı Şeyhzâde Fâtıma Hatun mülküne ve bir tarafı Keçeciler Hamamı’na ve bir tarafı tarîk-i âmla mahdûd tabaka-i ulyâda üç bâb oda ve bir bâb sofa ve tabaka-i vüstâda bir bâb oda va tabaka-i süflîda bir matbah ve iki kenîf ve bir su kuyusu ve zât-ı eşcâr-ı müsmire ve gayr-ı müsmireyi müştemil menzilinin nısf-ı şâyi‘ini merkūme Mükâfât’a yirmi bin nakd-i râyic fi’l-vakt akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi ber-minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr yirmi bin akçeden mezkûre Mükâfât’ın zimmetini ibrâ-i âmm ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâlî mevlânâ-yı mezbûr mahâllinde tahrîr ba‘dehû irsâl olunan Osman Çelebi le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-müderrisîn Ahmed Efendi b. Hüseyin, Mehmed Ağa b. Ramazan, Umdetü’l-kuzât Hasan Efendi b. Mustafa, Ahmed Efendi b. İbrahim, Hasan Beşe çukadâr-ı Şaban Efendi, Mehmed Çelebi b. Ali.