İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 852 Hüküm no: 1041 Orijinal metin no: [145b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Çelebi Vakfı’nın yeni mütevellisinin eski mütevellinin zimmetini ibra ettiği Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Monla Hüsrev mahallesinde vâki‘ Bostancıbaşı Sarayı’na varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i hatîr eyledikde saray-ı mezbûrda sâkin olup Vilâyet-i Anadolu’da İznik kasabasında vâki‘ merhûm Mahmud Çelebi nâm sahib-i hayrın vakfına bi’l-fi‘il mütevellî olan fahrü’l-emâsil ve’l-akrân Derviş Mehmed Bey b. Süleyman meclis-i ma‘kūd-ı mezbûrda işbu kitâbın sahibi umdetü’l-müderrisîni’l-kirâm zübdetül-müdekkıkīni’l-fihâm İlmî el-Hâc Mustafa Efendi b. İbrahim Efendi tarafından ikrâr-ı âti’z-zikri tasdîka vekîl olup vekâleti İbrahim Çelebi b. Süleyman ve Ali Bey b. Mustafa Efendi şehâdetleriyle şer‘an sâbite olan sulbî oğlu fahrü’l-müderrisîni’l-kirâm Hasan Efendi mahzarında bi’t-tevliye ikrâr ve takrîr-i kelâm edip sâbık mezbûr el-Hâc Mustafa Efendi vakf-ı mezbûra mütevellî olup bin yetmiş Muharremül-harâmı gurresinde ma‘zûl olup yerine ben mütevellî olduğumda muhâsebesi şer‘an görülüp vakf-ı mezbûrun gallesinden mezbûr Mustafa Efendi’nin makbûzu olan meblağdan yine vakf-ı mezbûr mescid-i şerîfi ve imâret-i âmireleri mürtezikalarının vezâif ve masraflarından fazla zamân-ı tevliyeti olan yirmi bir senede yedinde zuhûr eden dört yük ve on iki bin üç yüz yetmiş yedi akçeden dört yük doksan bin dokuz yüz altmış akçesini zamân-ı tevliyetinden azline dek minvâl-i muharrer üzere yirmi bir senede imâret-i mezbûrenin tâbhânesi ve matbahı va sofaları ve bevvâb odası ve ahırı ve cümle sakfları va sıva ve tuğla döşemeleri ve kaldırımları ve ahır içinin yemlikleri bi’d-defa‘ât imâret [146a] ve meremmetleri ve matbah muhterik olmağla müceddeden binâ ve mescid-i şerîfin dahi kubbesinin nısf-ı a‘lâsını müceddeden kurşun ve eteklerinin câ-be-câ yerleri cedîd kurşun ve camları tecdîd ve minâre külâhı dahi müceddeden binâ ve kurşun bu zikrolunan mevâzi‘in bi’d-defa‘ât imâret ve meremmetine yedinden îfâ olunup mûcebince sarf ve harc eylediği meblağa tutulup ve iki yük yirmi bir bin dört yüz akçesi dahi hakk-ı tevliyet için yedinde olup bâkī kalan yedi yük akçesini bi’t-tamam tevliyetim hasebiyle vakıf için mûmâ-ileyh Mustafa Efendi yedinden alıp kabz edip ve galle-i vakf-ı mezbûrdan mezbûr el-Hâc Mustafa Efendi yedinde bir akçe ve bir habbe bâkī kalmadı dedikde mukır-ı mezbûru ikrâr-ı muharrerinde vekîl-i mezbûr Hasan Efendi vicâhen tasdîk ve şifâhen tahkīk eyledikde mevlânâ-yı mezbûr mahâllinde ba‘dehû ma‘an irsâl olunan Osman Bey ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: es-Seyyid Lütfullah Efendi b. Nurullah el-imâm bi-Yusuf Paşa, el-Hâc Şaban Efendi b. Hasan mahalle-i mezbûr, Abdüllatif Efendi el-kādî, Çerkeszâde Mehmed Ağa, Mehmed Ağa b. Mustafa, Mumcu Mehmed b. Ahmed, Ramazan Çavuş el-mübâşir.