İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 853 Hüküm no: 1042 Orijinal metin no: [146a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ömer Efendi b. Osman Çavuş’un menzilinin varisleri tarafından Kadızâde Mehmed Efendi’ye satıldığı Dârü’l-hilâfeti’l-aliyye Kostantıniyyeti’l-mahmiye’de Haraçcı Muhyiddin mahallesinde sâkin iken bundan akdem fevt olan Ömer Efendi b. Osman Çavuş’un verâseti zevce-i metrûkesi Fâtıma bt. İsmail’e ve sulbî sagīr oğlu Osman ve sulbiye kebîre kızı Âişe Hatun’a münhasıra olup kable’l-kısme sagīr-i mezbûr Osman dahi fevt olup verâseti vâlîdesi Mücellâ bt. Abdullah’a ve li-eb kız karındaşı mezbûre Âişe’ye münhasıra olup kable’l-kısme mezbûre Âişe dahi fevt olup verâseti zevc-i mükerremleri a‘lemü’l-ulemâ’i’l-izâm efdalü’l-fudalâi’l-fihâm yenbû‘u’l-fezâil ve’l-meâli metbû‘i’l-efâzıl ve’l-e‘âlî Kādızâde Mehmed Efendi hazretlerine ve vâlîdesi merkūme Fâtıma Hatun’a ve sulbiye kebîre kızları Hadîce ve Fâtıma ve Emetullah’a münhasıra olduğu zâhir ve bi-tarîkı’l-münâsahati’ş-şer‘iye tashîh-i mes’eleleri yedi yüz yirmi sehimden olup sihâm-ı mezbûrenin iki yüz yirmi iki sehmi mezbûre Fâtıma bt. İsmail’e ve yüz altmış sekiz sehmi merkūme Mücellâ’ya ve doksan dokuz sehmi müşârün-ileyh Mehmed Efendi hazretlerine ve yetmiş yedişer sehmi mezbûrât Hadîce ve Fâtıma ve Emetullah’dan her birine [isâbet] eylediği bâhir oldukdan sonra husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi mahalle-i mezbûrede vâki‘ zikri [âtî] menzile varıp zeyl-i vesîkada isimleri mastûr Müslimîn huzûrunda akd-i meclis-i şer‘ eyledikde merkūme Fâtıma bt. İsmail tarafından zikri câ’î husûsu ikrâra vekîl olup mezbûrenin zâtını ma‘rifet-i şer‘iye ile ârifân olan Hüseyin Ağa b. Hasan ve İbrahim Efendi b. Sefer şehâdetleriyle şer‘an vekâleti sâbite olan birâderleri Ahmed Efendi b. İsmail vekâleten ve mezbûrât Hadîce ve Emetullah ve Fâtıma taraflarından kezâlik husûs-ı âti’z-zikre vekîl olup mezbûrâtın zâtlarını ma‘rifet-i şer‘iye ile ârifân olan Şeyhî Efendi b. Abdurrahim ve Hüseyin Ağa b. Hasan şehâdetleriyle şer‘an vekâleti sâbite olan ammileri umdetü kuzâtü’l-İslâm zübdetü vülâti’l-enâm müşârün-ileyh Mehmed Efendi hazretlerinin birâderleri Abdurrahim Efendi vekâleten meclis-i ma‘kūd-ı mezbûrda işbu kitâb-ı sıhhat-nisâb yed-i kerîmelerine vusûl ile şeref-yâb olan müşârün-ileyh Mehmed Efendi hazretleri mahzarlarında her biri ikrâr ve i‘tirâf edip mahalle-i mezbûrede vâki‘ etrâf-ı erba‘ası Mahmud Ağa mülkü ve Hamza Efendi vakfı ve Canbaz İbrahim tasarrufunda olan vakıf menzil ve Şaban Ağa menzili [ve] tarîk-i âm ile mahdûd hâricen ve dâhilen büyût-ı müte‘addideyi hâvî menzil-i müteveffâ-yı evvel-i mezbûr Ömer Efendi’nin ile’l-vefât mülkü olup ba‘de vefâtihî bi-tarîkı’l-münâsahati’l-mezkûr verese-i mezbûrûna isâbet ve intikāl edip lâkin mezbûre Mücellâ menzil-i mezbûr da olan yüz altmış sekiz sehm hissesini âhar terekeden istifâ edip menzil-i mezbûr sâir verese-i mezbûrât beynlerinde müşâ‘iyet üzere kalmış idi. El-hâletü-hâzihî müvekkile-i mezbûre Fâtıma bt. İsmail menzil-i mezbûrda olan iki yüz yirmi iki sehm hissesini otuz beş bin akçeye ve mezbûrât Fâtıma ve Hadîce ve Emetullah’dan her biri yetmiş yedişer sehm hissesini otuz bir bin akçeye müşârün-ileyh Mehmed Efendi’ye bâtten bey‘ ve teslîm onlar dahi iştirâ ve kabûl ve tesellüm ve kabz eyledikden sonra semen-i mezbûr cem‘an yüz yirmi beş bin akçeyi müvekkilelerimiz mezbûrât Hadîce ve Fâtıma ve Emetullah müşârün-ileyh hazretleri yedinden bi’t-tamam ahz u kabz edip menzil-i mezbûrun mecmû‘u müşârün-ileyhin ırsen ve şirâen mülkü ve hakk-ı sırfları olmuşdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hüseyin b. Ebûbekir ile meclis-i şer‘a gelip alâ-vukū‘ihî inhâ ve tahrîr etmeğin mâ-vaka‘a bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene isneteyn ve seb‘în ve lf. Şuhûdü’l-hâl: Mustafa Efendi b. Hüseyin el-kādî, Ebûbekir Çelebi, Mehmed Çelebi b. Ali, Umdetü’l-kuzâtü’l-İslâm Abdullah Efendi b. Mahmud Ağa, Muharrir-i hurûfi’s-sütûr Ahmed Efendi