İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 858 Hüküm no: 1049 Orijinal metin no: [147a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Bey’in küçük çocukları Mustafa ve Hatice’ye amcaları Rıdvan Beşe’nin vasî tayin olunduğu Hüccet-i vesâyet. Mahmiye-i İstanbul’da Yenibağçe kurbünde Kādıasker Mehmed Efendi mahallesinde sâkin iken bundan akdem vefât eden Mehmed Bey b. Halil nâm kimesnenin sagīr oğlu Mustafa ile sagīre kızı Hadice’nin kıbel-i şer‘den mansûb vasîsi olan Süleyman Bey b. Osman meclis-i şer‘-i hatîrde işbu râfi‘u’l-kitâb müteveffâ-yı mezbûrun li-ebeveyn karındaşı Rıdvan Beşe b. Halil mahzarında ikrâr ve takrîr-i kelâm edip işbu sene-i mübârekede hâcc-ı şerîfe gitmeğe niyet etmekle hüsn-i ihtiyârım ile vesâyet-i mezbûreden fâriğa oldum dedikde zeyl-i kitâb hâl ani’l-irtibâbda esâmîleri mastûr Müslimîn ve sikāt-ı muvahhidîn mezbûr Rıdvan Beşe hizmet-i vesâyete her vechile ehil olduğunu lede’ş-şer‘ ihbâr eylediklerinde hâkim-i muvakkı‘-ı tûbâ-lehû ve hüsnü-meâb hazretleri dahi mezbûr Rıdvan Beşe’yi sagīreyn-i mezbûreynin tesviye-i emrleri için kıbel-i şer‘-i enverden vasî nasb ve ta‘yîn eyledikde ol dahi vesâyet-i mezbûreyi kabûl ve hidemâtın edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Çelebi b. Süleyman, es-Seyyid Mehmed b. Nasuh, Hüseyin Beşe b. Mehmed, Osman Bey b. Üveys, Hamza Ağa b. el-Hâc Mehmed, el-Hâc Receb Çelebi b. Süleyman, Mustafa Çelebi b. Mehmed Ağa, Mustafa Çelebi b. Abdullah, Mustafa Ağa b. el-Hâc Receb, Durmuş Beşe [b.] Bayram.