İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 859 Hüküm no: 1050 Orijinal metin no: [147a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hacı Mustafa’nın alacak hususunda boşandığı kocası Hacı Mustafa ile sulh olduğu Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi Dârü’l-hilâfeti’l-aliyye Kostantıniyyeti’l-mahmiye’de Âşık Paşa mahallesinde el-Hâc Mustafa b. Abdullah nâm kimesnenin sâkin olduğu menziline varıp zeyl-i vesîkada isimleri mastûr olan Müslimîn huzûrunda akd-i meclis-i şer‘ eyledikde mezbûr el-Hâc Mustafa’nın zevce-i mutallakası Âişe bt. el-Hâc Mustafa tarafından husûs-ı âti’l-beyânı ikrâra vekîl olup mezbûrenin zâtını ma‘rifet-i şer‘iye ile ârifân olan Şaban Efendi b. Hasan ve Abdurrahman Dede b. Nasuh ve Hüseyin Efendi b. Şaban şehâdetleri ile şer‘an vekâleti sâbite olan el-Hâc Musa Çelebi b. el-Hâc Harbî meclis-i ma‘kūd-ı mezbûrda müvekkile-i mezbûrenin zevc-i mutallıkı merkūm el-Hâc Mustafa mahzarında bi’l-vekâle ikrâr ve i‘tirâf edip müvekkilem mezbûreyi merkūm el-Hâc Mustafa işbu târih-i kitâb günü talâk-ı bâyin ile tatlîk etmekle zimmetinde mütekarrir olan otuz dokuz bin akçe hesâbınca üç yüz riyâlî guruş mehr-i mü’ecceli merkūm el-Hâc Mustafa’nın emri ile Rüstem Paşa Vakfı’ndan olup Mustafa Paşa Çarşısı’nda vâki‘ berber dükkânı ve mahzen ve tülbentci dükkânlarından dört sehimden bir sehm hissesini ve Fâtıma Sultan Vakfı’ndan Balat Kapısı kurbünde vâki‘ bozahâne ve kazgancı dükkânlarının dört dört sehimden bir sehm hissesini dahi Çelebi Vakfı’ndan olup Yemiş İskelesi’nde vâki‘ kettâncı dükkânı ve mahzen ve yemişçi dükkânlarını dört sehimden bir sehm hissesini mahlûlden mütevellîsinden kendi mâlıyla tefevvüz edip müvekkilenin zimmetinde olan kırk dört bin akçenin otuz dokuz bin akçesine ve müvekkilem mezbûrenin kendi mülkü olup mezbûr el-Hâc Mustafa’nın istihlâk eylediği beş yüz dirhem gümüşün kıymeti olan beş bin akçeyi dahi meblağ-ı mezbûr kırk dört bin akçeden bâkī beş bin akçeye takās edip ol dahi mukāssa ve kabûl eylediğinden gayrı müvekkilem mezbûrenin mülkü olan Bedehşan nâm câriyeyi mezbûr el-Hâc Mustafa ahz u istihlâk etmekle kıymet-i şer‘iyesi olan dört yüz guruşu da‘vâ ve taleb eylediğinden beynlerinde münâza‘ât cereyân etmişdir el-hâletü hâzihu müvekkilem mezbûreyi da‘vâ-yı mezbûreden mezbûr el-Hâc Mustafa iki yüz guruş üzerine inşâ-i akd-i sulh eyledikde ol dahi sulh-ı mezbûru kabûl ve bedel-i sulh olan meblağ-ı mezbûr iki yüz guruşu müvekkilem mezbûre merkūm el-Hâc Mustafa yedinden bi’t-tamam ahz u kabz edip husûs-ı [147b] mezbûra ve sâir zevciyete ve gayra müte‘allika âmme-i da‘vâdan her biri âharın zimmetini ibrâ ve ıskāt eyledi deyü gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa b. İsa ve Hasan b. Mustafa nâm kimesneler ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Umdetü’l-emâcid ve’l-ekârim Mehmed Ağa b. Hüseyin, Lütfullah Efendi b. Emrullah el-imâm, el-Hâc Rıdvan b. Abdullah, İsmail b. Abdullah, el-Hâc Yusuf b. Abdullah, Mehmed b. Mustafa, Veli b. Mahmud.