İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 860 Hüküm no: 1051 Orijinal metin no: [147b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Memi b. Abdullah’ın çeyrek menzil hissesini Eyüb Çelebi b. Mustafa’ya sattığı Hüccet-i mülknâme. Medîne-i Ebî Eyyûb-i Ensârî’de Baba Haydar mahallesinde sâkin el-Hâc Memi b. Abdullah meclis-i şer‘-i şerîf-i lâzımü’t-tevkīrde işbu râfi‘u’l-kitâb Eyüb Çelebi b. Mustafa mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Davud Efendi nâm kādı mülküne ve bir tarafdan Mustafa Çavuş mülküne ve iki tarafdan tarîk-i âm ile mahdûd dört bâb fevkānî oda ve iki bâb tahtânî oda ve bir küçük oda ve bir sofa ve bir fevkānî oda ve bir fevkānî sofa ve bir matbah ve bir su kuyusunu ve eşcâr-ı müsmireyi hâvî bahçeyi müştemil mülk menzili zevcem olup bundan akdem vefât eden Âişe bt. Mehmed’in mülkü olup ba‘de vefâtihâ rub‘-ı şâyi‘i bana ve selâse-i erbâ‘ı sadrî oğluna intikāl ve isâbet eylemişdi el-hâletü hâzihî menzil-i mahdûd-ı mezbûrda olan rub‘-ı şâyi‘a hissemi bi-cümle’t-tevâbi‘ ve’l-levâhık mezbûr Eyüb Çelebi’ye on beş bin akçeye bâtten bey‘ ve teslîm ol dahi minvâl-i muharrer üzere iştirâ ve tesellüm ve kabûl eyledikden sonra semen-i mezkûrdan on üç bin altı yüz akçesini medîne-i mezbûrede ma‘lûmü’l-hudûd dükkân bedelinden mezbûr Eyüb Çelebi’ye zevcem mezbûrenin deyni olup ba‘de vefâtihâ benim ikrârım ile sâbit olan on üç bin altı yüz akçe deynimden zimmetimde şer‘an edası lâzım gelen meblağ-ı mezbûr on üç bin altı yüz akçeye takās ol dahi mukāssa ve kabûl edip bâkīsi olan bin dört yüz akçesini dahi mezbûr Eyüb Çelebi yedinden alıp kabz eyledim ba‘de’l-yevm menzil-i mezbûrun rub‘-ı şâyi‘i mezbûr Eyüb Çelebi’nin mülk-i müşterâsıdır mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Zilhicceti’ş-şerîfe li-sene 1072. Şuhûdü’l-hâl: Mehmed Çelebi b. Veli, Eyüb Beşe b. Mehmed, Baba Resûl b. Rıdvan, Şükrullah b. Mustafa.