İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 861 Hüküm no: 1052 Orijinal metin no: [147b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf’un kitabet bedelinin ödenmeyen kısmını efendisi Şaban b. Veli’ye ödediği takdirde hür olacağını ispat ettiği Hüccet-i isbât-ı bedel-i kitâbet. İşbu bâ‘isü’r-rakīm Yusuf b. Abdullah meclis-i şer‘de mahmiye-i İstanbul’da Cafer Subaşı mahallesinde sâkin Şaban b. Veli mahzarında üzerine takrîr-i da‘vâ edip mezbûr Şaban’ın ben abd-i memlûkü olup târih-i kitâbdan beş sene mukaddem beni otuz bin akçeye kitâbete kat‘ edip ben dahi meblağ-ı mezbûrun yirmi iki bin akçesini mezbûra teslîm edip ol dahi ahz u kabz etdikden sonra mezbûr Şaban bedel-i kitâbet olan meblağ-ı mezbûr otuz bin akçenin yirmi iki bin akçesini yedimden ahz u kabz edip ancak sekiz bin akçe bâkī kalmışdır meblağ-ı mezbûr “sekiz bin akçeden mâ‘adâ zimmetinde bir akçe alacağım yokdur meblağ-ı mesfûr sekiz bin akçeyi teslîm etdikde mezbûr Yusuf sâir ahrâr-ı asliyyîn gibi hür olsun” deyü târih-i kitâbdan bir gün mukaddem huzûr-ı Müslimînde ikrâr ve işhâd etmiş iken mezbûr beni bey‘ etmek murâd eder suâl olunsun dedikde gıbbe’s-suâl mezbûr Şaban cevâbında vech-i meşrûh üzere kitâbete kat‘ını ve bedel-i mezbûrdan yedi bin iki yüz akçesini kabzını ikrâr mâ‘adâyı bi’l-külliye inkâr edicek müdde‘î-i mezbûrdan müdde‘âsını mübeyyine beyyine [taleb] olundukda mahalle-i mezbûre sükkânından Hasan Ağa b. Abdülkerim ve Mustafa b. Kasım ve Mustafa Çelebi b. Abdullah ve Hüseyin b. Sefer nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezbûr Şaban târih-i kitâbdan bir gün mukaddem bedel-i kitâbet olan otuz bin akçenin yirmi iki bin akçesini mezbûr Yusuf yedinden ahz u kabz edip bedel-i kitâbetden ancak sekiz bin akçe hakkım kalıp meblağ-ı mezbûr sekiz bin akçeyi bana teslîm etdikde mezbûr Yusuf sâir ahrâr-ı asliyyîn gibi hür olsun deyü huzûrumuzda bizi işhâd eyledi biz bu husûsa bu vech üzere şahidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın meblağ-ı [mezkûr] sekiz bin akçeyi mezbûr Şaban’a teslîme merkūm Yusuf’a tenbîh olunup mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Zilhicceti’ş-şerîfe li-ene isneteyn ve seb‘în ve elf. Şuhûdü’l-hâl: Mehmed Çelebi b. Hüseyin, Şaban b. Ramazan, Ömer Çelebi b. Osman, Mahmud b. Hüseyin, Abdullah b. Yusuf, Ahmed b. Mehmed, Mustafa Efendi b. ( ).