İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 861 Hüküm no: 1053 Orijinal metin no: [147b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa ve Hatice’nin yeni vasîleri Rıdvan Beşe’nin eski vasîleri olan Süleyman Çelebi’nin zimmetini ibra ettiği Hüccet-i vesâyet-i Rıdvan. Mahmiye-i İstanbul’da Kādıasker Mehmed Efendi mahallesinde sâkin iken bundan akdem vefât eden Mehmed Bey b. Halil’in sulbî sagīr oğlu Mustafa’ya, sulbiye sagīre kızı Hadice’ye münhasıra olduğu şer‘an müte‘ayyin oldukdan sonra sagīrân-ı mezbûrânın ammileri ve hâlâ tesviye-i umûrlarına kıbel-i şer‘den mansûb vasîleri olan Rıdvan Beşe b. Abdullah meclis-i şer‘-i hatîrde işbu bâ‘isü’l-kitâb sagīrân-ı mezbûrânın sâbık vasîleri olan Süleyman Çelebi b. Osman mahzarında ikrâr ve takrîr-i kelâm edip sagīrân-ı mezbûrânın babalarından müntakil olup mezbûr Süleyman’ın makbûzu olan kırk bir bin beş yüz akçe asl-ı mal ile murâbahadan müctemi‘ olan üç bin dört yüz akçe ki cem‘an kırk dört bin dokuz akçeden yedi bin dokuz yüz akçesini ba‘de’l-muhâsebe müfredât defteri mûcebince sagīrân-ı mezbûrânın nafaka ve kisveleri ve sâir levâzımları için harc u sarf edip bâkī otuz yedi bin akçesini mezbûr Süleyman Çelebi yedinden vesâyetim hasebiyle ahz u kabz eyledim ba‘de’l-yevm sagīrân-ı mezbûrânın mezbûr Süleyman Çelebi yedinden asl-ı mâl ve murâbahadan bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Hamza Ağa b. el-Hâc Mehmed, el-Hâc Receb Çelebi b. el-Hâc Süleyman, Mustafa Ağa b. es-Seyyid el-Hâc Receb, Mustafa Çelebi b. Abdullah, el-Hâc İbrahim [b.] Hamza, Hasan Beşe b. Mehmed, el-Hâc Mustafa b. el-Hâc Mehmed Bursevî, Muslı Ağa b. Ali, Mustafa b. Mehmed, Mehmed Çelebi b. Muslı.