İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 862 Hüküm no: 1054 Orijinal metin no: [148a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beşe b. İbrahim Vakfı’nın eski ve yeni mütevellileri arasında devir-teslim işleminin gerçekleştirildiği Hüccet-i vakıf akçe be-taleb-i nâzır zağarcıbaşı. Husûs-ı âti’l-beyânın mahâllinde tahrîri iltimâs olmağın savb-ı şer‘den Mevlânâ Ahmed Efendi irsâl olunup ol dahi Dârü’l-hilâfeti’l-aliyye Kostantıniyyeti’l-mahmiye’de Kızıltaş mahallesinde hâlâ Dergâh-ı âlî yeniçerileri ocağında zağarcıbaşı olan umdetü’l-emâcid ve’l-ekârim câmi‘ü’l-mehâmid ve’l-mekârim el-Hâc Hüseyin Ağa b. Ali’nin sâkin olduğu menzil-i âlîlerine varıp zeyl-i vesîkada isimleri mastûr olan Müslimîn huzûrunda akd-i meclis-i şer‘-i şerîf eyledikde zikri âtî meblağın hasbî nâzırı olan müşârün-ileyh el-Hâc Hüseyin Ağa meclis-i ma‘kūd-ı mezbûrda zikri câ’î meblağın berat-ı şerîf ile mütevellîsi olan Ahmed Ağa b. Mehmed mahzarında takrîr-i kelâm edip Dergâh-ı âlî yeniçerilerinin kırk dokuzuncu ağa bölüğüne mahsûs odanın sâbıkā odabaşısı olan merhûm İsmail Beşe b. İbrahim’in vakf eylediği bin beş yüz kıt‘a riyâlî guruşa mezbûr Ahmed Ağa’dan mukaddem mütevellî olan Ahmed Efendi’den mezbûr Ahmed Ağa asl-ı mal olan bin beş yüz riyâlî guruşun her biri sekizer dirhem olmak üzere bin dört yüz otuz buçuk riyâlî guruşunu ahz u kabz etmişdir suâl olunup takrîri tahrîr olunmak murâdımdır dedikde gıbbe’s-suâl mezbûr Ahmed Ağa kazıyye bâlâda tafsîli mürûr etdiği vech üzere mu‘terif olmağın vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Veli b. Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Yazıcı b. Mehmed kâtib-i vakf-ı mezbûr, Umdetü’l-emâcid ve’l-e‘âlî Mehmed Ağa b. Sinan, Hüseyin Bey b. Hasan Bey el-yesârî, Hasan ağa b. Ali, Hasan Odabaşı b. Hasan Ağa, Ahmed Beşe b. Mehmed, Mustafa Çelebi b. Mehmed, Osman Yazıcı b. ( ).