İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 863 Hüküm no: 1056 Orijinal metin no: [148a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısırlı Avraham v. Haham Yasef’in atlas bedelinden olan alacağını ödemesi için Yasef v. Kamal’e süre verildiği Hüccet-i imhâl. Yahûd tâifesinden Mısırlı Avraham v. Haham Yasef nâm Yahûdî tarafından meblağ-ı câ’i’z-zikri da‘vâ ve taleb ve ahz u kabza ve müvekkiline îsâle iddi‘â-i vekâlet eden işbu rafi‘u’l-kitâb Kerson v. Haham Yasef nâm Yahûdî meclis-i şer‘-i hatîrde Budin cemâ‘atinden diğer Yasef v. Kamal nâm Yahûdî muvâcehesinde üzerine da‘vâ ve takrîr-i kelâm edip müvekkilim mezbûr Avraham’ın merkūm Yasef zimmetinde yedinden müşterâ ve makbûz levn ve cins [ve] zirâ‘ı beynlerinde ma‘lûm atlas semeninden üç bin beş yüz yirmi altı esedî guruş hakkı vardır suâl olunup alıverilmek taleb ederin dedikde gıbbe’s-suâl mezbûr Yasef cevâbında müdde‘î-i mezbûrun cümle müdde‘âsını inkâr edicek evvelâ müdde‘î-i mezbûrdan vekâletini mübeyyine beyyine taleb olundukda yine tâife-i mezbûreden olup Siron cemâ‘atinden İsak v. Yako ve Çana cemâ‘atinden Avraham v. Mosi nâm Yahûdiler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûru merkūm Mısırlı Avraham bizim huzûrumuzda merkūm Yasef zimmetinde atlas bahâsından hakkı olan üç bin beş yüz yirmi beş esedî guruşu da‘vâ ve taleb ve ahz u kabza ve kendüye îsâle tarafından vekîl ve nâib-i menâb nasbeyledikde ol dahi kabûl ve hidemâtın edâya ta‘ahhüd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra minvâl-i muharrer üzere atlas bahâsından mezbûr Yasef’in müvekkil-i mezbûre üç bin beş yüz yirmi beş esedî guruş deyni olduğunu mübeyyine beyyine taleb olundukda vekîl-i mezbûr Kerson ityân-ı beyyine için istimhâl etmeğin mehl-i şer‘î ile imhâl olunup mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Osman Çelebi b. Abdullah, Şükrullah Çelebi b. Mustafa, Mehmed b. Ramazan, Hasan b. Mustafa, Mustafa b. Abdullah, Ahmed b. Abdülcabbar, Abdi b. Hüseyin