İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 865 Hüküm no: 1058 Orijinal metin no: [148b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri Kethudabeyi Mehmed Ağa’nın Venedik’de esir tutulan Salih Çorbacı’yı kurtarmak üzere Argiri v. Madros’u vekil tayin ettiği Hüccet-i esir, tahlîs. Dergâh-ı âlî dâme mahfûfen bi’l-meâli yeniçerilerinin kethudâ beyi olan umdetü erbâbü’l-izzi ve’l-ikbâl zübdetü ashâbi’l-mecd ve’l-iclâl zü’l-izzi’l-aliyy ve’l-kadri’l-celî ‘izzetlü Mehmed Ağa taraf-ı bâhirü’ş-şereflerinden husûs-ı câ’i’z-zikri ikrâra vekîl olup mefharu kuzâtü’l-Müslimîn Yahya Efendi b. Mehmed ve Ahmed Ağa b. Mehmed şehâdetleri ile şer‘an vekâleti sâbite olan iftihârü’l-emâcid ve’l-akrân dâmadı Ahmed Ağa b. Mustafa meclis-i şer‘-i hatîr-i lâzımü’t-tevkīrde havlıcan? tüccârından Argiri v. Madros nâm zimmî muvâcehesinde bi’l-vekâle ikrâr ve takrîr-i kelâm edip yine tâife-i mezbûrenin sekizinci cemâ‘atine mahsûs odada çorbacı iken dârü’l-harb olan Venedik’de esir ve mahbûs olan Salih Çorbacı b. ( ) mezbûr Argiri müvekkilim ağa-yı mûmâ-ileyh emri ile varıp mahâllinden iki bin riyâlî guruşa vekîl-i tahlîs ve dârü’l-İslâma idhâl etmek üzere mezbûr Argiri’yi irsâl murâd eylediğinde meblağ-ı mezbûrun bin riyâlî guruşunu mezbûr Argiri’ye teslîm edip ol dahi ba‘de’l-kabz yine benim yedime emânet vaz‘ eyledikden sonra min-ba‘d mezbûr Argiri varıp esir-i mezbûr Salih Çorbacı’yı tahlîs ve dârü’l-İslâma idhâl ederken bi-emrillâhi te‘âlâ vefât ederse ve yine mezbûr Argiri’nin yedimde emânet vaz‘ eylediği bin riyâlî guruş ile müvekkilim ağa-yı mûmâ-ileyhde olan bin riyâlî guruşu mezbûr Argiri’ye edâ ve teslîm olunmak üzere müvekkilim ağa-yı mûmâ-ileyh ile mezbûr Argiri kavl ve muâhede edip ol dahi ba‘de’l-kabûl hizmet-i mezbûreyi edâya ta‘ahhüd eyledi dedikde gıbbe’t-tasdîkı’ş-şer‘î. Fi’l-yevmi’t-tâsi‘ ve’l-işrîn min-Zilhicceti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-eşbâh Kethudâyeri Kâtibi Mehmed Efendi, Mehmed Çavuş b. Hamza, Osman Ağa b. ( ), Ahmed Beşe b. Yusuf, Hasan Beşe b. Abdullah.