İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 865 Hüküm no: 1059 Orijinal metin no: [148b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Menteş v. Minas’ın biber bedelinden Yasef v. Kemâl zimmetinde dört bin dört yüz akçe alacağı olduğu İsbât-ı deyn-i bahâ-i büber hüccetidir. Mahmiye-i İstanbul’da Yahûdî tâifesinden olup Portugal cemâ‘atinden işbu râfi‘u’s-sifr Menteş v. Minas meclis-i şer‘-i hatîr-i lâzımü’t-tevkīrde Yasef v. Kemâl nâm Yahûdî mahzarında üzerine da‘vâ ve takrîr-i kelâm edip mezbûr Yasef zimmetinde her vakıyyesi yüz onar akçeye olmak üzere yedimden müşterâ ve makbûz kırk vakıyye biber semeninden dört bin dört yüz akçe hakkım olup hatta biber semeninden bana dört bin dört yüz akçe deyni olduğunu târih-i kitâbdan bir gün mukaddem mesfûr Yasef alâ-re’si’l-işhâd ikrâr ve işhâd etmişken meblağ-ı mezbûru vermede ta‘allül eder suâl olunup alıverilmesi matlûbumdur dedikde gıbbe’s-suâl mezbûr Yasef husûs-ı mezbûru bi’l-külliye inkâr edicek müdde‘î-i mezbûrdan müdde‘âsını mübeyyine beyyine taleb olundukda yine tâife-i mezbûreden olup cemâ‘at-i mezbûreden David v. Aslan ve Mosi v. Avraham nâm Yahûdiler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûr Yasef târih-i kitâbdan bir gün mukaddem müdde‘î-i mezbûr Menteş’e yedinden müşterâ ve makbûz kırk vakıyye büber semeninden dört bin dört akçe zimmetimde deynim vardır deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde min-ba‘d [gıbbe] ri‘âyeti şerâ’iti’’l-kabûl şehâdetleri makbûle olmağın meblağ-ı mezbûr dört bin dört yüz akçeyi müdde‘î-i mezbûr Menteş’e edâ ve teslîme mezbûr Yasef’e tenbîh birle mâ-vaka‘a bi’t-taleb ketb olundu. Fi’l-yevmi’l-işrîn min-Zilhicceti’ş-şerîfe li-sene 1072. Mefharu’l-mevalî es-Seyyid Hüsam Efendi, Hüseyin b. Muharrem, Mehmed b. Halil, Bayram b. Abdullah.