İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 869 Hüküm no: 1065 Orijinal metin no: [149a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Abdullah’ın aldığı Yeniçeri Ağa Bölüğü’ne mahsus vakıftan ödünç aldığı Hüccet-i istiğlâl. Husûs-ı âti’l-beyânın mahâllinde tahrîri için gıbbe’l-iltimâs kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi mahmiye-i İstanbul’da Şeyhferhad mahallesinde Mehmed Beşe b. Abdullah’ın sâkin olduğu menziline varıp zeyl-i rakīmde muharrerü’l-esâmî olan Müslimîn huzûrunda akd-i meclis-i şer‘-i şerîf eyledikde mezbûr Mehmed Beşe meclis-i ma‘kūd-ı mezbûrda Dergâh-ı âlî dâme merci‘an bi’l-e‘âlî yeniçerilerinin otuz yedinci ağa bölüğüne mahsûs odanın mühimmât-ı lâzımesine mevkūf nükūda bi’l-fi‘il mütevellî olan işbu bâ‘isü’l-kitâb Mustafa Beşe b. Ebûbekir mahzarında ikrâr ve takrîr-i kelâm edip mahalle-i mezbûrede vâki‘ iki tarafı Abdülbaki Çelebi mülkü ve bir tarafı Sâliha Hatun mülkü ve bir tarafı tarîk-i âm ile mahdûd fevkānî iki bâb oda ve bir sofayı ve bir tahtânî kiler ve mahtab ve bir tahtânî oda ve bir su kuyusunu ve bahçe ve kenîfi müştemil mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık bi-tarîkı’l-istiğlâl mütevellî-i merkūm Mustafa Beşe’ye yetmiş iki bin akçeye bey‘ ve teslîm ol dahi vech-i muharrer üzere iştirâ ve tesellüm eyledikden sonra semeni olan meblağ-ı mezbûr yetmiş iki bin akçeyi mütevellî-i merkūm yedinden tamamen ahz u kabz eyledikden sonra yine menzil-i mahdûd-ı mezbûru ba‘de’t-tahliyeti’ş-şer‘iye ve’t-tekābuzi’l-mer‘î târih-i kitâbdan üç yüz yetmiş gün tamamına dek on bin sekiz yüz râyic fi’l-vakt akçeye mütevellî-i merkūm bana îcâr ve teslîm ben dahi vech-i muharrer üzere istîcâr ve tesellüm eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû irsâl olunan el-Hâc Veli ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Zilhicceti’ş-şerîfe li-sene isneteyn ve seb‘în ve efl. Şuhûdü’l-hâl: İbrahim Beşe b. ( ) er-râcil, Hasan Odabaşı b. Ahmed, vekîlharc Mehmed Beşe b. ( ), Mehmed Beşe b. ( ), Mehmed Çelebi dellâl-ı bedestân, İbrahim Çelebi b. ( ) er-râcil, Mustafa b. Ali, el-Hâc Ömer Çelebi b. ( ).