İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 870 Hüküm no: 1066 Orijinal metin no: [149b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Ömer ve ortağı Mehmed b. Muharrem’in kendisine emanet ettiği paranın yangında zâyi olduğuna dair Mehmed b. Veli’nin yemin ettiği Hüccet-i men‘. Mahmiye-i İstanbul’da eş-Şeyh Ebulvefâ kurbünde sâkin Hüseyin b. Ömer ve şerîki Mehmed b. Muharrem nâm kimesneler dîvân-ı sadrazamîde ma‘kūd meclis-i şer‘-i enverde yine mahmiye-i mezbûrede Parmakkapı kurbünde Kaliçeci Hasan mahallesinde sâkin Mehmed b. Veli nâm kimesne mahzarında üzerine da‘vâ ve takrîr-i kelâm edip târih-i kitâbdan beş sene mukaddem iki yüz elli riyâlî guruş benim ve yüz elli riyâlî guruş dahi şerîkim işbu hazır bi’l-meclis mezbûr Mehmed b. Ömer’in ki cem‘an dört yüz riyâlî guruşumuzu kendi menzilinde hıfz ediver deyü mezbûra îdâ‘ ve teslîm ol dahi tesellüm etmiş idi hâlâ meblağ-ı mezbûru merkūmdan taleb ederiz suâl olunsun dediklerinde gıbbe’s-suâl mezbûr Mehmed cevâbında ber-minvâl-i muharrer mezbûrânın bi’l-emâne makbûzum olan dört yüz riyâlî guruşlarını kabzı Kaliçeciler Hanı’nda olan mahzenimde hıfz üzere iken bin yetmiş senesi Zilka‘desi’nin on altıncı gününde vâki‘ harîkde hân-ı mezbûr muhterik olmağla mezbûr zâyi‘ olduğunu ikrâr ve hân-ı mezbûrda olan mahzende hıfz eyle deyü emrini inkâr etmekle mezbûr Mehmed’den def‘-i mezbûru için beyyine taleb olundukda mahmiye-i mezbûre mahallâtından Hoşkadem mahallesinde sâkin Salih b. Mehmed ve Kadırga Limanı kurbünde Yenimahalle sükkânından Ahmed b. Ali nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka zikrolunan dört yüz riyâlî guruşu müdde‘iyân-ı mezbûrân merkūm Mehmed’e “Var, Kaliçeciler Hanı’nda olan mahzeninde hıfz eyle” deyü bizim huzûrumuzda emreylediler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinden gıbbe ri‘âyeti şerâ’iti’’l-kabûl şehâdetleri makbûle oldukdan sonra zikrolunan meblağ-ı mezbûr merkūm Mehmed’in te‘addî ve taksîriyle zâyi‘ olmadığına merkūm Mehmed’e yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince müdde‘iyân-ı mezbûrân Hüseyin ve Mehmed bî-vech mu‘ârazadan men‘ olundu. Mâ vaka‘a bi’t-taleb ketb olundu. Fî-gurreti Muharremi’l-harâm li-sene selâse ve seb‘în ve elf. Şuhûdü’l-hâl: Mefharu’l-emâsil ve’l-ayân İbrahim Ağa ser-çavuşân, Fahrü’l-emâsil ve’l-ayân Hüseyin Ağa b. ( ), Mehmed Çavuş b. Hamza, Mehmed Ağa b. Mahmud, el-Hâc Ömer b. Ali, Mehmed Ağa b. Mustafa, el-Hâc Yusuf b. Abdullah.